一歲啦﹗

號外呀﹗號外呀﹗我燒腩仔今日一歲大啦﹗媽媽話要貼張bithday poster出來公告天下呀（實情係之前開生日會design咗唔好浪費）﹗為咗隆重其事，媽媽已經一早同我影咗輯一歲相，玩咗cake smash，開咗mini生日會，生日蛋糕都已經食咗幾個，佢話今日會再帶我去街玩呀﹗YEAH!



等我講返今個月嘅進度先，繼續一日五餐三奶兩固體，今個月胃口好返少少，無再搞好耐都未食完一碗粥，但飲奶就依然餐餐有餘，不過自從媽媽上個月開始每餐都畀枝BB匙羹我拎住，我終於有D意識枝BB匙羹係用來「畢」嘢食，我有時會用隻匙羹敲個餐盤來叫媽媽畀我試吓自己「畢」，雖然仲未成功自己「畢」到嘢食，但我一定會繼續努力練習㗎﹗

係生日之前，我第四隻牙終於都爆出來啦，不過因為今個月多咗出街玩，媽媽又忙住幫我慶祝生日，連帶試新食物嘅數量都少咗好多，只係試過椰菜花，同係婆婆屋企偷食咗苦瓜同蓮藕咋，但我就學識咗樣絕招餵媽媽食橙，氹到媽媽好開心呀﹗

瞓覺方面就有少少轉變，踏入十一個月之後，媽媽就同我轉咗一日只瞓兩次晏覺，瞓少一覺之後媽媽就唔使再好似以前挾持人質咁逼我瞓，因為我夠鐘無電會好快瞓著，不過如果出街的話我就只肯瞓一次晏覺，至於夜晚一覺都叫瞓到天光，但期間會合埋眼係床到喊，試過有晚每隔兩個鐘就喊一次，媽媽第二朝即刻投訴我搞到佢無覺好瞓喎...



我宜家已經識得自己摛上梳化同自己落梳化，除咗可以鬆手完全唔扶嘢行到七八步之外，出街有時都會扭爸爸放我落地自己行，而媽媽見我就咁單手拖住爸爸都行到，就畀咗件飛虎衫我著，著住佢我可以行到成條街㗎（不過就超心急唔係行得好穩囉），大家覺得我係唔係好有型呢？

雖然我到尋日先終於學識拍手，但我呢個月都學識咗唔少嘢㗎，識得同人握手，識得除衫時要舉高手，識得手指指，識得學大人整D「嗒嗒」聲，識得講「姐姐」同「嗲嗲」，而最令媽媽震驚嘅就係學識咗開佢部iphone啦﹗佢完全無教過我點用㗎﹗但原來篤個button再跟住箭咀畫係零難度，十次有九次我都可以自己開到，搞到媽媽宜家要好小心收埋部電話唔畀我拎到﹗（勁驚佢撞錯三次密碼我乜嘢資料都無晒囉﹗）

媽媽話我呢個月另一樣嘢好抵讚嘅就係成功戒奶咀啦﹗基本上我從來都唔好奶咀，好細個時已經會食奶咀食到發忟，都係有時瞓覺時先肯啜一陣，個幾星期前嘅某一晚我忽然唔想再啜奶咀，咪死都要吐返個奶咀出來囉，然後媽媽廢事搞到我咁燥就無再夾硬塞畀我，咁我唔咬奶咀又瞓到覺喎，然後我就好自然咁戒咗奶咀啦﹗


 
我最近已經識得分小朋友同大人，如果出街見到BB或者大我少少嘅哥哥姐姐，我會好high咁尖叫去叫佢哋，但如果見到D中年女人，雖然我都會眼定定咁望住佢哋，不過我其實好驚佢哋，如果佢哋同我講嘢嘅話我會扁咀喊㗎（婆婆同嫲嫲除外）﹗

隨住我表達喜惡同活動嘅能力越來越強，媽媽成日都話我係百厭星上身，扭多咗好多好多好多計喎，一有唔鐘意我就會發脾氣激到佢彈吓彈吓，有時媽媽越話唔畀做嘅嘢我就越要去做，有時衰咗畀佢鬧時我仲會好man咁忍住痛扮無嘢，唔...婆婆話我呢D行為似十足媽媽，來緊有排佢受，不過媽媽就無有怕咁同返我講，話我遲早會有報應喎﹗