小幫手備年篇

每年農曆新年前艾菲都係忙到一頭煙，今年早過年情況就更加嚴重，就連大掃除都無乜點掃過（唔...其實平時都有keep住執屋嘅），好彩我家小幫手燒腩仔尚算合作，叫佢幫手做呢樣做嗰樣都即時埋位，認真完成我哋畀佢嘅每一樣小任務。



今年無正式大掃除，不過年三十晚點都要執吓屋吸吓塵，燒腩仔今年無再搶住幫手，但就主動跳咗入BB豆豬張床同妹妹玩，難得一見嘅相親相愛仲笑到咔咔聲，又等有黐媽症嘅BB豆豬可以放過艾菲一陣，抵錫﹗



等艾菲做完基本清潔，就到燒腩仔出場入全盒啦﹗今年我哋連瓜子都無買（無乜人食年年都剩好多好浪費），全個全盒都係放燒腩仔至愛嘅糖同朱古力，佢梗係出盡全力塞晒落去，話咁快已經放到蓋到閂唔埋咁滯。




入完全盒要紥返個利是落去利利是是，燒腩仔都入得有板有眼咁喎。



再紥多對桔落去就搞掂啦﹗YEAH！



等米高下午放工返來，佢就拎咗D環保利是封出來畀燒腩仔幫手入吓利是，見佢都好認真摺銀紙同打開個利是封入落去㗎，當然我哋有做QC全程望住，眼見小手肌一直麻麻嘅佢入得幾好，只係唔小心整爛咗幾個封，艾菲覺得佢進步咗好多呢﹗



入完利是就再同米高一齊夾手夾腳貼好晒全屋嘅揮春，小幫手好搞笑咁話自己好忙囉﹗kakaka...



除咗貼揮春，入全盒同入利是外，小幫手前一日仲好乖咁同我哋去咗花墟買花（實情係一家四口去），艾菲今年本來想插紫色菊花，但諗咗好耐都唔係好知點襯花好唯有放棄（唔太想傳統中式插法），然後一行入花墟就畀D繡球花吸引住，揀咗兩個比較少見嘅色，再簡簡單單襯落跳舞蘭到，又紅又紫又黃咁，好有新年feel呢﹗



而另一邊廂，艾菲過年點都要玩吓蒸糕bell整色整水先安樂，由於今年湊住兩個比較困身， 所以只係整咗呢個大熱紫薯年糕就要收爐，比想像中麻煩但甩模見到個紫色真係幾開心，聽埋燒腩仔大叫「嘩﹗好靚呀﹗」同不停話「你聽日煎年糕我食吖」就覺得辛苦D都係值嘅。

 

然後明明話收爐，不過眼見雪櫃放咗半罐整年糕剩低嘅椰汁又抵唔住頸，整咗個叮噹椰汁糕出來，今次試用新食譜整，米高話似佢至愛嘅松記椰汁糕，仲一晚就KO晒全個，搞到燒腩仔今日問艾菲幾時有得食都唔知點答佢好添呀﹗又大家宜家明點解艾菲咁忙仲要整嘢佢兩父子食啦，嘻...