自家揮春2017

一年一度自家揮春又來啦﹗上年大住肚都整到，今年BB豆豬出咗世，更加無理由唔整，而今年艾菲更加係決心來個大革新，轉過個底色又轉埋字款，又另外自己𠝹咗D新圖來做配圖（原來宜家已經無乜free PSD圖download），感覺叫做無咁悶囉﹗



唔覺唔覺已經係第四年自己整揮春，小model一埋位大概都知要影D咩，原先諗住快快手手搞掂收工去玩，點知...呢兩兄妹好似食錯藥咁，平日笑點其低嘅BB豆豬居然點氹都唔笑，而燒腩仔就故意搞搞震唔合作，唔係整D騎呢樣出來就係唔望鏡頭，兩兄妹合照永遠一個笑一個唔笑，搞到艾菲同助手米高都無晒癮，最終連衫都懶換（本來一人有三套衫）求其影夠收工，反而上年超唔合作嘅表妹仔今年又超合作喎，一個鐘內極速完成，所以話呢...小朋友永遠都係估你唔到，同佢哋影相分分鐘難過中六合彩﹗



由於今年早過年，變相所有嘢都來得好趕急，艾菲都唔敢怠慢，已經安排月初影相，偏偏遇著三母子齊齊病（好似年年呢個時候都中招>.<），艾菲同BB豆豬更加係拖到宜家都仲未斷尾，一個咳到甩肺一個鼻水長流，而BB豆豬就應該因為咁而一連幾晚keep住每個鐘醒一次（晚晚無得抖真係人都癲），以至砌稿嘅進度一直緩慢進行，但都叫做兩星期內完成，算係歷年來最快一次。



砌好稿印好圖後，一心以為有個weekend假期，可以快手做埋後期起貨，點知之前買開PVC膠間文具鋪居然無貨﹗行咗兩三間家品鋪都無淨色透明嘅PVC膠賣，終於搵咗兩日先喺另一間文具鋪搵到，唯有快手用一日時間趕工貼膠cut圖（呢D要高度集中精神嘅工夫一定要D細嘅返學或者瞓覺先做得），相對舊年算係無乜意外同快手咗，而製成品都叫做靚靚仔仔見得人，大掃除後就可以貼到周屋都係啦﹗