八個月

Hi! Hi! 我八個月大啦﹗媽媽又遲咗成個星期先畀我出場，不過佢話呢排好忙好多嘢排住隊要做，所以畀我插隊出呢篇blog已經好好喎﹗



宜家我每日都會食兩餐粥仔，由於媽媽無以前餵哥哥咁緊張，所以呢個月只係加咗節瓜，蕃薯，粟米，蛋黃，洋蔥，魚肉，奇異果同士多啤梨呢幾樣新食物，而我就因為忽然感冒胃口變得好差，由之前廿分鐘食到一大碗粥，進展到最近半個鐘都食唔到三分一碗，搞到媽媽都餵到無晒心機，好彩呢排鼻水停咗又食返好D。

至於媽媽一直好想實行嘅減奶大計，係徹徹底底地失敗㗎，宜家除咗兩餐粥之外，我一日大概要飲四至五餐奶，視乎有無出街同瞓得好唔好而定，媽媽話我其實係心癮當佢奶咀，有時根本只係hea啜，但見我食完肯瞓同最近又輕磅咗，都由我放題任食，而且佢塞咗兩次奶之後（艾菲：應該關佢食到時間亂晒，同埋病咗食少咗事），奶量明顯少咗好多，宜家隔成七八個鐘佢都唔係點谷，所以抱住餵得一日得一日嘅心態餵我囉﹗



瞓覺繼續係我嘅超弱項，宜家每晚十一點飲最尾一餐奶，飲前捽晒眼扭晒眼瞓，但飲完就會成個生猛返，四圍搞搞震玩到凌晨一點先肯瞓，一星期都有一至兩日可以一覺瞓天光（艾菲：好彩的話），等到七點鐘媽媽叫我起身食奶， 但更多時候係半夜四五點就醒一醒（艾菲：最差試過一個鐘醒一次>.<），啜完之後都肯即刻瞓返嘅，不過頂多瞓到十點半就會畀哥哥嘈醒。

連帶晏覺都瞓得好差，明明之前可以一口氣由一點瞓到三點幾，但宜家成日一個鐘多D就醒，但好嘅係接完哥哥放學後五點幾六點會倦極再瞓多一個鐘，等媽媽有返D時間同哥哥做功課同煮飯，而夜晚一nap如果媽媽食完飯有落街嘅話會瞓到陣，但如果喺屋企的話就寧願捽眼大叫發忟都唔肯瞓，媽媽話我個生理時鐘好唔OK，來緊要積極幫我tune返好D喎...（艾菲：哥哥一放假去得街多就亂晒﹗）



黐媽症今個月係強勢回歸，特別係夜晚十點打後開始有D眼瞓時，每晚媽媽去沖涼我都會梨花帶雨咁喪喊，無論爸爸點氹點抱都無用，等到媽媽抱返我就會即時冧豬豬咁笑返，搞到爸爸醋意大發，話媽媽唔可以離開我超過兩米嘅安全範圍，不過呢...其實除咗媽媽之外，有另一個人我都OK㗎，呢個人就係媽媽嘅媽媽囉，食飽時我肯跟婆婆玩唔要媽媽一陣㗎﹗



媽媽成日話我活動能力係A++，除咗爬行姿勢越來越正統之外，我宜家已經可以扶住嘢自己企起身，甚至慢慢向左向右移動，但就成日起咗身唔識坐返低，會企到喊晒口咁求救或頂唔住腳軟跌低，手仔亦相當靈活，識將D嘢由一隻手轉去另一隻手，仲識得開電視櫃拎入面嘅DVD出來逐隻研究添﹗（艾菲：真係睇少眼都唔得﹗）



最鐘意玩哥哥D重型玩具，佢個玩具琴，停車場同入面D tomica車仔幾乎畀我反轉再反轉，得閒又會撩佢D勞作同圖書來摸吓試吓味（艾菲：調返轉燒腩仔都成日玩妹妹D BB玩具㗎喎），如果哥哥主動撩我玩同我講嘢嘅話我會笑晒口咁回應，但佢唔理我都無乜所謂可以自己玩，不過大家唔好以為我好隨和呀，有次哥哥夾硬扯開我手唔畀我彈佢個琴，我用眼神同喊聲同爸爸媽媽求救不果後，都識得靠自己郁手推開哥哥以示反抗㗎﹗（艾菲：再大D應該會打交都似﹗>.<）



媽媽話我呢個月多咗好多聲氣，成日發出「啊」「唔」「巴」「打」呢幾個音，又成日bu口水整到口水肩濕晒，而爸爸同媽媽之間我明顯係叫媽媽先㗎﹗媽媽初時話我應該係未有意識叫媽媽，但爸爸就留意到我係每晚黐媽症發作時先會不停「啊唔...啊唔...媽」咁叫，所以話我係知自己叫緊邊個嘅，而且我最鐘意聽媽媽唱歌，每次佢一唱歌我都會定晒格咁望實佢，係媽媽嘅頭號粉絲來㗎﹗