又消失咗好幾日，除咗因為鼻敏感到勁唔舒服之外，亦因為畀兩個高需求小朋友搞到身心俱疲，排住好多篇blog想寫，但呢一刻真係想幫自己嘅情緒搵個出口。
有睇開艾菲blog嘅朋友仔應該都知道，燒腩仔一向係個情感上比較敏感嘅小朋友，由兩歲開始就日扭夜扭無無謂謂乜都可以扭一大餐，起初以為只係trouble 2同terrible 3，眼見佢升K2後明顯有改善，仲老懷安慰以為終於捱完，點知放假前一排開始佢D情緒又忽然來料，放假後更加係變本加厲日日大玩不合作運動，呢幾日單係處理佢嘅問題艾菲大概嘔咗一噸血都有，有日甚至同佢嘈到失聲添（想像到有激動嗎...）﹗
一直以為佢只係屋企或見到艾菲先係咁，但原來呢個問題都有延續到返學校，今日去接放學時就畀燒腩仔班主任捉住傾咗陣，當然老師講嘅除咗情緒外仲有其他嘢（都係唔好嘢，但詳情唔講啦），然後有個傻瓜媽媽一個人湊住兩個細返娘家，坐喺巴士到望住一臉稚氣嘅燒腩仔，揹住扭緊眼瞓嘈咗半程車嘅BB豆豬，堅係想咩都唔理爆喊出來，可惜嘅係艾菲任性唔來唔想嚇親燒腩仔，於是眼淚只好通通往心裡流。
其實老師講嘅都唔係D咩大問題，雖然要跟進但大家都覺得情況唔算嚴重，只係忽然有個外來嘅第三者叫你去面對一D問題，作為當事人嘅心裡總係唔多好受，而且對於燒腩仔兩年幾來反反覆覆嘅情緒問題，艾菲實在係受夠啦，再加上BB豆豬最近黐媽症超級嚴重，艾菲困身無氣抖之餘亦明知燒腩仔嘅情緒有大部分係來自妹妹，就更覺無奈同無助...
自從妹妹出世後，艾菲米高同身邊嘅親友就不停輔導燒腩仔，我哋亦盡量唔畀妹妹影響佢嘅生活，甚至去邊做咩都係以佢為中心，明明最差嘅時光都已經捱過咗理應無咩問題，不過眼見佢到宜家都係會簡中做D傷害妹妹嘅行為，又成日扮妹妹扁咀加咇兩滴眼淚嘅樣來同我哋扭呢樣扭嗰樣，仲成日聽到妹妹喊就扭埋一份趁火打劫，艾菲真心覺得自己呢個媽媽做得好失敗，好似做咩都幫唔到自己兩個小朋友咁。
好幾次同燒腩仔嘅老師傾偈，佢哋都以為艾菲係好遷就燒腩仔，以至佢成日出現扭扭擰擰嘅情緒問題，但實情係艾菲已經企得好硬，必要時亦可以好惡，咁燒腩仔無論軟功還是硬功都唔受，依然故我地想扭就扭，艾菲仲可以點做呢？如果係精力過多嘅問題的話，艾菲已經成日安排機會畀佢出街放電，不過每次放完電攰到明明可以一秒瞓著，佢都寧願堅持扭來扭去而唔上床瞓，咁又係咩問題呢？
艾菲從來唔係D咩偉大媽媽，艾菲都會有情緒，會失落會難過會想逃避會鑽牛角尖，但可幸嘅係艾菲係講咗出來就會舒服嘅人，所以嘛...呢到講呢到散，呻完畀自己好好休息靜一靜，望吓兩個小朋友嘅開心相，第二朝瞓醒又繼續打怪獸囉﹗
P.S: 特別鳴謝妹豬媽聽艾菲呻，又多謝小檬媽嘅問候，喺到識到大家可以互相扶持，真係艾菲最大福氣呢﹗
沒有留言:
張貼留言