卡通毛巾＠淘寶

上一篇blog講過，為咗整咬咬巾艾菲喺淘寶到搵咗幾日毛巾，但睇來睇去價錢都係偏貴，雖則以呢個價買扮有牌子嘅毛巾係抵，但艾菲要嘅唔係牌子嘛，終於皇天不負有心人，畀艾菲搵到呢間外貿卡通毛巾浴巾制品嘅鋪頭，under兩蚊人仔買到一條卡通毛巾， 仲要個公仔係靚靚仔仔無走樣，質地又OK㗎喎，大大大推介呀﹗



首先出場嘅有燒腩仔至愛McQueen，16x16cm大，盛惠一蚊人仔一條﹗平到你唔信﹗艾菲睇晒商品介紹同評價先敢買，收貨前都擔心係會有咩瑕疵，結果唯一搵到嘅瑕疵就係唔夠四四方方囉，完全不影響日常使用﹗



除咗McQueen之外，仲有Toy Story同Minion，同樣係一蚊人仔一條﹗



全部最抵係右下角條Minnie Mouse，九毫子人仔有交易，其餘三條20x20cm大嘅就貴少少，1.5人仔一條﹗



跟住出場嘅有畀艾菲用咗來做咬咬巾嘅米奇碎花款，20x20cm大1.6人仔一條，下面條魚仔就同size平一毫子。



咁多條毛巾入面最貴係呢條麵包超人，25x25cm大，要2.5人仔一條﹗



最後出場係呢三條有圈圈可以掛嘅抹手巾，20x30cm長，前後兩邊都有公仔，1.8人仔一條，原先諗住放洗手間用來抹手，不過收貨後發現摸落有D鞋手，咁唯有轉放廚房抹碗啦﹗

呢到合共22條毛巾，只需30蚊人仔，真係抵到無朋友，買來畀小朋友返學用，整唔見整污糟都唔使肉赤，但呢間鋪有樣唔好就係包郵定價好高（128人仔先包郵），不過毛巾其實好輕身國內運費都係八蚊人仔姐，集運到港後除返開個價兌返港紙都實平過香港買。