草地相@啟德跑道公園

望住BB豆豬一日一日大，眼見佢越坐越好，艾菲就記掛住要同佢影返張草地相，皆因燒腩仔當年有張好sharp醒嘅草地相，公平起見艾菲好想BB豆豬都影返張，但要艾菲宜家嘅身世帶住佢哋去老遠嘅數碼港影，未免係太搵自己笨嘅idea，記得上次去啟德跑道公園參加Red Bull飛行日，用iphone hea影個大草地出來嘅效果都幾靚，所以燒腩仔同學約除夕gathering時，艾菲就有D私心地推介咗啟德跑道公園呢個地方。



好開心呢日唔太凍又有大太陽，加上呢到只得大草地無遊樂設施，一定唔會好似佐敦谷咁旺場，自己一班小朋友坐埋一個角落瘋狂地亂跑亂叫都得。



為食嘅燒腩仔一去到，最記掛嘅竟然係艾菲買畀佢嘅巨型棉花糖，食完先捨得同同學仔去玩，不過又好快已經玩到進入瘋狂狀態。



燒腩仔同同學仔玩到癲晒，艾菲決定唔阻佢同米高夾手夾腳抱BB豆豬去草地中心影相，又估唔到BB豆豬會全程坐定定畀艾菲影喎，睇來佢應該同哥哥一樣屬觀察型，未摸熟環境前唔會亂來。



YEAH！開心寶寶來啦﹗



繼續笑唔停﹗妹妹笑點低真係好易氹呢﹗



不過艾菲最愛都係呢個天然呆嘅樣﹗



難得捉到燒腩仔埋來一齊影，但佢點都唔肯再坐近D BB豆豬...



咁唯有BB豆豬做主動捱埋哥哥身邊，來張偽相親相愛嘅相啦﹗嘻...（如果無咗後面個帳幕同BB車就perfect啦﹗）