眾所周知，生女嘅好處係可以幫個女扮靚，喺衫褲鞋襪方面基本上唔到艾菲操心，表姐仔一袋又一袋嘅靚衫塞爆晒屋企嘅衣櫃，所以艾菲轉而專注喺頭飾方面，尤其BB豆豬唔算多頭髮，唔帶頭飾出街就會畀人問係唔係弟弟，然後有日收到朋友嘅朋友親手整嘅小髮夾，再上網睇片研究咗一輪，發現自己整一D都唔難，自此開始沉淪喺呢門小手作嘅毒海裡...
呢個深藍色千島格嘅母女頭飾係艾菲第一個整畀BB豆豬同自己嘅頭飾，專門襯返我哋嘅母女裙，艾菲向來都唔係點打扮自己（實情係唔識啦），但帶上頭箍後感覺都OK唔會太浮誇喎。
BB豆豬個headband係由一個深藍色大蝴蝶托起個千島格孖蝴蝶，簡簡單單又不失高貴，用來襯裙仔最好，而且條橡筋帶好襟用，由三個月帶到宜家八個月都仲啱帶呢﹗
第二個整畀BB豆豬嘅係呢個桃紅色皇冠headband，專門整畀BB豆豬百日宴做主角時用，由於BB豆豬當時頭仔仲係好細，就咁一個皇冠再喺下面加層紗已經好搶眼。
成功整到兩個headband後，艾菲就心思思想試整髮夾同橡筋，不過BB豆豬實在係無頭髮夾頭夾同紥頭髮，唯有搵表姐仔同其他朋友嘅女個頭來試艾菲D實驗品啦﹗
跟住唔覺唔覺已經到咗中秋節，又一個艾菲好鐘意嘅節日，咁啱淘到隻兔仔返來，幫佢裝飾吓貼埋落朵紫色花隔離，既應節又可愛﹗艾菲大愛呀﹗
由於燒腩仔同BB豆豬都係高需求小朋友，艾菲真係劑牙膏咁劑D時間出來先可以做吓自己嘢，咁啱有日下午米高放半日返來幫手湊佢哋，艾菲即刻開工整呢兩個想整好耐嘅大蝴蝶headband。
先試第一個用三層輕紗整嘅大蝴蝶結headband，帶上頭到變咗成份禮物咁，哈哈...浮誇得來不失高雅﹗啱晒去飲去威去見人﹗
至於呢個用淺藍色碎花蝴蝶托出來嘅喱士蝴蝶headband就相對casual D，帶住佢去郊遊好鬼match呢﹗
有日無意中見到舊Tee可以用來整headband嘅報導，艾菲屋企無嘢多就係舊衫多，於是拎咗件燒腩仔唔啱著嘅舊衫來整咗呢個headband，不過艾菲預短咗所以要再剪D布碎出來加長佢，好彩出來效果都幾好幾型，但就畀米高問BB豆豬係唔係帶住佢去賣拉麵囉﹗（哼﹗fashion嘅嘢男人識條X咩﹗）
另一條用燒腩仔舊tee變出來嘅headband，簡簡單單容易襯，有時落吓街接哥哥放學，艾菲都會同佢帶呢條headbnad就出門口。
自從愛上整頭飾後，艾菲最愛流連嘅就係AEON十二蚊店，睇工具睇材料咩都睇一餐，忽然畀艾菲喺銅鑼灣間十二蚊店發現咗呢兩條萬聖節絲帶，即買﹗
由於事前無諗過整萬聖節頭飾，所以屋企無乜材料配合到，於是用兩條幼身絲帶簡簡單單整咗兩個蝴蝶結BB夾畀BB豆豬，同一個襟章形髮夾畀表姐仔參加萬聖節party，又估唔到個BB夾都幾好用，連BB豆豬呢D無乜頭髮嘅都夾到，不過用之前真係要練吓先，否則好易整痛BB。
連萬聖節頭飾都整咗，聖誕呢個大節日又點可以唔做嘢，一早淘咗堆聖誕絲帶返來，但就一拖再拖拖到十二月中先開工...
雖然咁多個頭飾入面，只得呢個headband係屬於BB豆豬，不過艾菲都好用心去整㗎，綠色絲帶整嘅聖誕樹，簡簡單單加幾粒閃石即時變得搶眼，再加埋用紅色格仔絲帶整嘅頭花，襯埋粒金色星星仔，好閃好靚呀﹗
眼見聖誕頭飾拖到最後一刻先整實在有D臨急抱佛腳feel，為免農曆新年前太忙連整都無時間無mood整（整手作仔係好睇心情㗎嘛），所以一口氣整埋呢堆新年頭飾畀BB豆豬同表姐仔，中式款基本上係無咩好揀，都係大紅色粉紅色乜都整D，希望襯到佢哋兩位大小姐嘅戰衣啦，嘻...
就係咁艾菲唔覺唔覺越整越多，但實情BB豆豬只係得一個頭，不過艾菲就未有停下來嘅意慾，皆因見到BB豆豬帶住自家頭飾靚靚女女咁出街，間中畀朋友同途人讚艾菲D小手作，個滿足感都真係幾大，而平安夜當日仲專登拉米高同燒腩仔陪艾菲去深水埗行布街尋寶添，宜家已經滿腦idea，期待來緊日子有更多自家頭飾，可以喺到再同大家分享﹗
沒有留言:
張貼留言