順應燒腩仔要求，一家四口齊齊由中環逼叮叮落金鐘，一落車就見到Pacific Place呢棵大聖誕樹，今年好似無乜邊個商場有咁大又咁傳統嘅聖誕樹，難得見到當然要影返張相，然後就陪放半日仲未食lunch嘅米高去買D嘢食。
搞掂就坐扶手電梯上香港公園，見仲有幾日就係聖誕，艾菲呢日特別同BB豆豬帶咗自家製聖誕headband，至於燒腩仔都帶咗個聖誕老人閃燈心口針，又艾菲事後睇返相先發現自己當日同BB豆豬原來係同色系間條襯到絕，嘻...
經過公園門口個瀑布亭，燒腩仔仍然未有勇氣行入去，跟住沿路行去水池邊睇魚睇花，呢日天氣都幾好，有大太陽得來又唔太涼唔太熱，啱晒去公園郊遊呢﹗
經過一條長長嘅斜路後，我哋終於到達兒童遊樂場，燒腩仔當然第一時間跑上去sir呢條成層樓高嘅滑梯，呢日平日下午真係唔多人，平均排三四分鐘就有得玩，而且公園有安排專人喺到睇住，大家都好守秩序，燒腩仔sir咗N咁多轉幾乎玩到唔願走，每次落來都笑到見牙唔見眼咁同艾菲講「好驚」，就知佢好鐘意呢條滑梯啦﹗
哥哥喪玩滑梯，艾菲都嘗試搵D嘢畀BB豆豬玩， 不過呢到個遊樂場因為維修有兩層封咗，只係得返底褲韆鞦，沙池，同一條短滑梯，所以要玩又要排一輪隊先到我哋。
之後艾菲捉咗燒腩仔去沙池玩沙，以為燒腩仔會鐘意，點知佢原來仲未係好識控制部挖泥機，再加上忽然潔癖（對腳玩玩吓放咗上去唔想掂到D沙），明顯睇得出佢唔多enjoy。
玩完挖泥機艾菲叫佢嘗試用手挖個窿來玩，但佢就咁喺沙面掃幾吓敷衍吓就算，一掂到入面濕少少嘅沙就係咁拍手想整走D沙...
見燒腩仔玩到咁都廢事糾纏落去拉佢走，然後著鞋時發現隻腳仔畀嘢咬咗幾啖，艾菲拎藥膏同佢搽時見到佢自己整咗個十字落去即忍唔住爆笑同影低佢，艾菲平日同佢講嘅嘢佢都無咁上心，妹豬媽上次教佢畀嘢咬可以印個十字落去止痕佢就記到實一實呢﹗
因為仲有下一個行程，見時間差唔多艾菲就搵地方同BB豆豬食下午茶奶，順便試試迷暈佢等佢一陣精神D，但睇公園地圖指示育嬰室要去返近Pacific Place嘅位置都幾遠（即要行返條長斜路走），眼見隔離體育館咁近可能有（政府設施多數會有育嬰室），即管過去問問諗住頂多入更衣室餵，跟住個職員就教艾菲行過對面嘅香港壁球中心（遊樂場落條樓梯就到），原來呢邊有個又大又舒服嘅育嬰室，作為一個B不離身嘅母乳媽媽，出街時搵到個近住自己所在位置又乾淨嘅育嬰室，舒舒服服咁餵飽BB真係件好開心嘅事來㗎﹗
沒有留言:
張貼留言