DIY咬咬巾

自從BB豆豬出世後，燒腩仔姨媽就畀咗條舊hip seat艾菲用，雖則係淘寶貨，但用落都OK舒服，唯獨係條咬咬巾，口腔期嘅BB豆豬時不時會舐條咬咬巾，所以一直想同佢換過條新（始終表姐仔咬過嘛），但原來唔係周圍有得買，睇FB代購日本款甚至淘寶搵，價錢都係偏貴感覺唔多值，終於把心一橫決定自己DIY。



要整咬咬巾，首先要準備好同款毛巾仔兩條，20cmx20cm呢個size就啱啱好，放落條帶到唔太長又唔太短，花款最好揀碎花，因為就算有靚靚大公仔，摺咗三摺後都唔會睇到，艾菲呢四條係淘寶淘返來，純棉之餘面料仲要係紗布料來，啱晒畀BB豆豬用，而最最最重要一點係盛惠1.6人仔一條﹗﹗﹗（同店仲有好多靚靚卡通毛巾，下篇blog介紹）



除咗毛巾，另一樣要準備嘅就係啪鈕，原先艾菲瘋狂到想淘部啪鈕機返來（整連芯被D膠啪鈕），諗住成日DIY總會有用，不過後尾路過AEON十二蚊店先醒起有呢種用針線聯嘅啪鈕，反正咬咬巾唔會成日除落來，用呢種啪鈕都已經夠。



準備好晒材料就可以開工，就咁拎條毛巾仔摺三摺包住hip seat條帶度位，對準位後喺前後各釘兩粒啪鈕嘅開合扣就完事啦﹗ 嘻...係唔係好簡單呢？



製成品唔差得過街賣㗎，而且自己DIY唔怕同人撞款添﹗