行年宵＠維園

一如往年，艾菲唔去一去維園年宵係唔安樂㗎，原先想好似上年咁第一日入場，但今年第一日原來係星期日，預計都會多人就無揀呢日去，改喺星期二燒腩仔學校親子年宵嘉年華之後去，貪平日夜晚又未到年廿八應該無咁多人，而且第二日燒腩仔放假玩夜D都唔怕嘛。



學校年宵嘉年華去到四點，見未有耐到米高放工，艾菲就一早plan定去中央圖書館餵奶，仲預先book好玩具圖書館，畀兩個小朋友好好消磨時間，玩完啱啱好米高就來接我哋，為免我哋行來行去，米高仲建議我哋喺中央圖書館樓下嘅Delifrance到食晚餐，實行一站式吃喝玩樂，大人細路都對呢個安排相當滿意呢﹗



食飽就行過對面維園年宵，趁BB豆豬未瞓著之前影返張到此一遊先﹗佢玩咗成日只係瞓咗一個鐘晏覺，艾菲一早估到佢食飽粥仔就會做豬，果然張相影完唔夠五分鐘已經瞓著，一直瞓到我哋走先醒一醒，再喺返屋企嘅車程中又瞓多一轉。



有過上年嘅經驗，燒腩仔都已經醒目，主動話畀我哋知佢想要波（上年入場前仲傻更更話要風車），咁其實艾菲都早有準備，見以前跟過自己嘅intern妹妹喺facebook話開檔賣波，就一於問定檔口號碼去支持下，結果就以超驚喜價買咗個Mater波波返來，姐姐仲好好咁送咗個扣畀燒腩仔扣實個波喺件衫到添，但可能上年飛走波嘅陰影實在太大，個波扣住喺衫佢都仲係唔多放心，隻手不停捉住個波嘅吹氣位，又不停話好大風吹到個波四圍走，緊張到呢...



買完波後見人流開始多，反正我哋又無咩特別想買，純粹行吓湊吓熱鬧，為免燒腩仔扭計，快手行埋濕貨區睇吓D花就走， 而艾菲今年係再一次用$30嘅價錢買到棵蘭花（原價$100/3盆，單盆要$50，艾菲當然問有無得平，老闆話$40四四聲唔好聽主動減到$35，但艾菲又咁啱無散紙喎，老闆咪收$30算囉，嘻...），仲要好fit之前個花盆唔使怕轉盆時整爛D根添，Yeah﹗