呢段路其實四年前我哋已經帶燒腩仔來過，當時全靠米高推住BB車推只得四個月大嘅燒腩仔行，今次再來燒腩仔已經識行識走，真係大個仔啦﹗
我哋一如四年前一樣，由鰂魚涌出發上栢架山，經大風坳再去大潭水塘，雖然沿路都係石屎路兼無樓梯，不過呢日大太陽仲要無風，其實都幾惡頂，好彩我哋一早帶定冰水，芭蕉扇同大量零食旁身。
一如所料，燒腩仔行咗一陣就嘈，唯有停低畀佢食隻蕉叉吓電，順便睇吓靚靚風景，呢日霧霾襲港空氣污染指數其高，但中午前望出去仲望到對面海，就連我哋上次行五桂山塊訊號板都望到。
行咗一大段斜路後，燒腩仔又開始唔多頂得住，又搵D無聊嘢分散吓佢嘅注意力，啱啱遇到個路牌，我哋講笑咁教佢將大風坳讀成大風吹，佢即好開心咁笑，其實佢都幾易氹㗎﹗
跟住行吓行吓，畀佢望到地下有D紅葉，剩機停低睇吓影吓相，最後我哋執咗兩塊返屋企。
再向前行去到一個無遮無擋嘅位，可以清楚見到幾座山嘅山脈，又望到山下嘅樓景，超靚﹗
趁BB豆豬仲未瞓，影返張相打個卡先﹗
呢日行山嘅人都幾多，仲有D係旅行團形式，熱鬧得來都幾嘈，不過就畀我哋遇到唔同嘅小朋友，有個十歲左右嘅小男生，行行吓忽然同大人扭話想行第二條路，仲堅持自己一個走咗去，又有一個十二三歲左右嘅女生，邊吹住風扇邊發出煩音，唔耐煩地不停問「行完未」同「仲要幾耐呀」， 所以燒腩仔只係扭飲水同食糖，嗌咗幾次要抱但唔理佢又繼續自己行，算係好乖好叻仔啦﹗
經過一輪上山嘅斜路後，終於都到check point大風坳，當然第一時間搵個靚位坐低休息吓，然後呢個BB豆豬一畀艾菲放出來，即笑到冧冧豬咁嘅樣。
大人細路齊齊野餐，順便幫米高個袋減吓磅，雖然一早出門無煲粥仔，但艾菲都帶咗糊仔去開畀BB豆豬食，至於燒腩仔就有米高特別為佢準備嘅驚喜啫喱。
食飽叉夠電就起行，忽然有個爸爸為咗氹個仔，喺個百寶袋到變咗包蝦片出來，燒腩仔見到當然雙眼發光搶住食，艾菲就完全無佢兩個咁好氣呢（艾菲好似一直都無畀過蝦片薯片燒腩仔食）﹗
離開大風坳後係一輪落山嘅斜路，燒腩仔喺米高嘅蝦片攻勢下無再嘈嘈閉，大半個鐘後亦見到水塘啦﹗
即上水壩影返張到此一遊相﹗
見個石屋幾靚，又呃燒腩仔埋去影騎呢相，kakaka...
之後睇吓魚，擒吓馬騮架又繼續向前行。
去到尾段忽然見到好靚嘅紅葉，可惜艾菲無帶變焦鏡影唔到close up。
見到路邊駁位就話要玩木衡木。
見到最後一個水壩，終點在望啦﹗
臨走影返張全家幅先，BB豆豬個樣咩事呀，已經唔使你行啦喎，仲咁不屑嘅？
終於行咗三個半鐘就完成今次嘅行程，睇落條路無上次上魔鬼山同五桂山咁辛苦，但原來唔覺唔覺D落斜位都幾傷腳，艾菲返到來小腿都酸軟咗兩三日呀﹗
沒有留言:
張貼留言