寒假一天＠青衣公園

星期一，特如其來嘅一天寒假，其實前一晚臨瞓前，屋企個天文台長米高已經話氣溫會回升，亦唔會好似早一日咁落雨，果然第二朝一覺瞓醒，雖然仍然係凍但陽光普照，感覺係溫暖咗好多，然後有個小朋友瞓醒一覺，見到爸爸竟然仲喺屋企（佢為咗陪艾菲覆診同唔想咁凍爬起身返工，一早已經拎咗全日假），係興奮到爬上我哋床尾勁歌熱舞自我放電，就連艾菲都唔多頂得住佢嘅瘋狂，所以話教署宣布停課，對家長來講未必係件好事，不過實際情況係有需要時，都要學會接受現實，返少日學為保小朋友健康安全，艾菲覺得自己湊得辛苦D都值嘅﹗



見到個仔充滿電力，米高就建議趁呢個難得嘅假期，去青衣公園走一趟以完艾菲一年一度之約，真心艾菲都掙扎咗一輪先肯出門口，教署宣布停課，唔係畀小朋友四圍玩，而係怕佢哋有危險所以叫佢哋留喺屋企，但眼見燒腩仔嘅hyper，唔帶佢出去跑吓跳吓，呢日我哋肯定好難過，而且天氣的確比預期中好，又有米高喺到幫手睇實應該安全，所以最終都決定出發去玩，先喺青衣城食個lunch，專登叫個兒童餐畀佢，罕有地掃清光唔使勞氣，Good﹗



一年一度嘅青衣公園，由於艾菲實在太懶懶閒，完全無追縱紅葉狀況，到醒起仲未來青衣公園，已經過晒紅葉期，所以今次都預咗係來行吓hea吓就算。



寒冬下坐草地曬太陽，識得歎一定係咁歎，kakaka...



之後帶佢行入去睇瀑布，竟然遇著無開喎，咁唯有玩吓氹氹轉自己圍圈行啦﹗



Hello!



睇完瀑布就向遊樂場方向行，期間見到有個劇場嘅物體無人，就叫佢過去執吓樹葉伸展吓。



一塊兩塊三塊四塊...



行咗陣終於返來呢個指定位置啦﹗四年嘅轉變可以有幾大？自己睇。



最後當然要畀佢去遊樂場喪玩一輪先走得啦﹗不過可能係停課關係，遊樂場係超多小朋友，期間遇著兩個八歲同十歲左右嘅哥哥，應該係陪個三歲嘅妹妹來玩，喺條吊橋喪跳整到D小朋友企唔穩跌低都算，仲癲到爬上設施嘅最頂想跳返落來（連艾菲都無留意到，企咗喺佢哋腳下面，係米高叫住艾菲先即閃），期間燒腩仔爬緊攀爬架向上去，佢哋兩個就喺呢個時候夾硬向下爬，其中一個隻腳係幾乎踩到燒腩仔隻手（實際係個鞋底已經掂到燒腩仔隻手），呢個時候艾菲終於忍唔住喺對面叫住佢，叫咗幾聲佢先捨得縮開隻腳直接跳落地，而佢個媽媽（應該係）就出聲話返艾菲轉頭，強調佢個仔無踩到燒腩仔，艾菲解釋佢無踩到但已經掂到，唔係叫住佢已經踩咗落去，佢先勁晦氣咁話「唔好意思囉」，跟住再來多句「使唔使咁保護呀」，然後勁鬧燒腩仔係珠光寶氣唔掂得，再邊鬧邊拉三個仔女走。

講真，艾菲自問唔係怪獸家長，好多時除咗燒腩仔出手蝦人時會出聲制止，佢畀人蝦時艾菲只會企隔離等佢哋自行了斷（都試過畀其他差不多年齡嘅小朋友推甚至出手打，但佢哋父母有即時制止，艾菲都唔會出聲），但宜家情況係你明知畀佢一腳踩落去，小朋友隻手有機會受傷整親，而你小朋友只得三歲根本唔會識得避開咁醒，作為家長嘅去阻止呢件事發生（仲要只係出聲渴止唔係郁手推開佢），都叫過份保護？如果調轉被踩嘅係你個三歲細女，你都一定會出聲啦，艾菲知道兩個小朋友都大個，做家長嘅唔需要望到實可以全程玩電話，但唔代表佢哋做錯你仲要強出頭夾硬話返人哋轉頭囉﹗呢D先係真正嘅過份保護同最差嘅身教﹗而且個公園係畀2-5歲小朋友玩，全場除咗佢兩個都係清一色1-6歲左右嘅小豆丁，你唔係有責任教你兩個仔唔好亂來整親其他小朋友咩？呢D家長嘅思維，艾菲真係一D都摸唔透﹗