慢遊元朗＠聖誕節

難得聖誕節正日無party，咁一覺瞓醒解開咗燒腩仔呢個世界上有無聖誕老人嘅謎團後，我哋點都要搵D嘢做，忽然米高話想入元朗行吓，well...自從上年年頭路過發現條條街都係人之後，艾菲實在有D怕怕，但佢似乎好想去搵好嘢食咁，就姑且陪佢癲吓啦﹗



入到去都差唔多兩點，第一時間衝去成記茶寮搵食，好彩仲搵到位坐，艾菲本來想叫豉油皇豬扒飯，但阿姐話一定要雙拼（應該係豬扒就賣晒，所以一定要雙拼），咁就拼雞球啦，而米高就叫咗粟米汁雞球飯，來到係比想像中還要大碟同足料，艾菲要同燒腩仔share先食得晒，連米高一個大男人都KO唔到一碟， 至於味道方面，豬扒無想像中好味，反而雞球真係啖啖肉兼入味。



雖然呢到係大排檔無冷氣又坐得唔舒服，但真係坐無虛席D客一個接一個入來，到兩點阿姐已經話賣晒雞球，基本上係佢話有咩賣你就食咩，我哋好彩食到水尾一轉嘅瑞士雞翼，但明顯師傅係即製唔太夠入味，不過燒腩仔就食到舔舔脷好欣賞咁，食完成碗飯仲自己拆到一隻。



食飽梗係要搵D嘢畀燒腩仔放電啦，艾菲就提議去元朗公園走轉，記得細個時燒腩仔公公都帶過艾菲來玩，印象最深係個百鳥塔，睇雀唔係重點，一口氣衝上塔頂先係精粹所在，然後今次來到先發現有咁大個草地，仲要遇正日落時間，呢D位影相OK喎，可惜艾菲呢日無帶相機。



一場來到點都要帶燒腩仔上百鳥塔走轉，但我哋無一口氣衝上塔頂，事實係艾菲宜家實在無氣衝上去，所以就慢慢同佢睇吓雀，再上到塔中間望吓風景就走啦...



來得公園，又點可以唔畀燒腩仔去遊樂場放電，於是睇地圖行咗去另一邊遊樂場玩，都幾BB level，但燒腩仔都玩得好enjoy。



玩完就行另一邊離開公園，見到草地種滿呢D樹，再一次後悔點解無帶相機來，否則就可以叫燒腩仔喺樹底下扮吓偽文青啦﹗

離開公園後我哋行咗去元朗劇院，一心係入去借洗手間，點知發現咗間好平同無咩人嘅cafe，於是同燒腩仔坐低叫咗個tea來食，餵飽佢就畀佢靜靜地挨喺米高大脾瞓陣，大人都剩機休息吓叉吓電，good﹗



本來米高係想留低喺元朗食大大碟壽司刺身㗎，但體諒到艾菲同燒腩仔都唔食得D咩，佢就提議坐西鐵去荃灣食元氣高速線壽司，艾菲見自己唔太肚餓，又諗住APM開多咗一間，呢間元祖店應該唔使等咁耐，點知...一等就等咗足足兩個鐘﹗真係上次喺札幌都無等咁耐呀﹗好彩燒腩仔好喜歡呢個安排，佢開心就乜都抵返﹗



食完高速線壽司，行過商場大堂仲見到Thomas布置，燒腩仔呢個車迷係發晒狂咁直衝入去，好彩呢個鐘數已經無咁多人。



鐘意到自己擺晒pose叫艾菲同佢影相，於是我哋好順利咁就同佢渡過咗一個好開心嘅聖誕節。