由燒腩仔識行開始，艾菲一直留意住佢嘅入字腳問題，到接近兩歲情況其實改善咗好多，但每次個人一攰就會好易跌，行商場又會經常啜地板行到就跌就跌咁，以前返N日日行長命樓梯返學放學，更加係一星期跌三四次，跌到膝頭長期有疤連老師都留意到問題，終於有次提議我哋返健康院跟進，於是艾菲就喺上年七八月，自己打去健康院約期見醫生同姑娘，評估一輪之後就寫咗一封轉介信畀我哋去聯合兒科。
事隔四個月之後，十二月中終於第一次去見醫生，而米高都好好咁請咗日假一齊陪診，去慣政府醫院覆診嘅艾菲都早有準備，預咗會勁多人同等勁耐，所以一早就同米高講早D出門口，早D去博早D睇完早D走，但有個小朋友係慣性出門前扭扭擰擰，結果我哋都唔早得幾多到...
去到艾菲即叫米高睇實燒腩仔，自己就拎齊文件排隊登記同俾錢，然後職員畀咗個紙杯燒腩仔留小便，再入檢查室度高磅重驗小便量血壓，之後就係無了期嘅等等等同等，最終我哋等咗差唔多一個鐘先有得見醫生，期間小朋友當然有D失控，亦唔知係唔係空氣唔太流通，燒腩仔塊面明顯敏感起晒一撻撻紅印。
入到房醫生同幫手嘅嬸嬸都好nice，醫生先問我哋屋企背景資料，再了解燒腩仔情況，然後就叫燒腩仔行一次畀佢睇，最後先除褲上床檢查，醫生一望都望到燒腩仔有輕微入字腳，而初步檢查腳仔後就話佢應該係膝頭嘅肌肉比較弱，所以成日行路會有所謂嘅「輪盡」情況，但安全計都建議抽血檢查有無一D肌肉酵素問題，另外安排我哋做物理治療，教燒腩仔用力用得好D。
另外我哋都有同醫生講燒腩仔嘅濕疹問題，其實艾菲自知佢情況未係好嚴重嗰批，但睇見佢日R夜R，D傷口係半年來都未好過，呢頭好返佢又再R損，確實係幾心痛，好彩醫生無因為佢唔係好嚴重而唔理，仲好好人咁開咗一大樽豬油膏同一細盒BB都用得嘅類固醇畀我哋旁身，認真Good﹗
見完醫生，因為要同燒腩仔趕返學，所以艾菲就同米高兵分兩路，艾菲排隊約覆診期，米高就去藥房放低藥單，再去另一邊約期做物理治療，搞掂之後艾菲就同燒腩仔喺走廊食個包再等夠鐘抽血。
入去抽血前，艾菲已經同燒腩仔大概講過成個抽血過程，亦拎定包Qoo出來做奬勵同分散佢嘅視線，入到去先由艾菲抱實佢坐大脾，然後抽血員見佢咁細，專登搵多個抽血員來幫手㩒住另一隻手，有個小朋友到呢一刻仲未知死咁對住兩個抽血員（姐姐）喺到甜笑，到抽血員準備好拮針時，艾菲都驚佢會郁自己捉唔實，好彩到拮時佢只係大叫咗聲「好痛呀」，然後人哋話唔好郁佢就真係乖乖唔郁，直至抽咗成筒血都無再喊過一聲，搞掂之後又即時對住人哋甜笑，搞到人哋想唔讚佢都唔得，kakaka...
抽完血出返走廊坐陣，艾菲同米高當然狂讚佢叻（自從歲半針之後無再拮過針啦），佢就好開心咁飲埋佢包Qoo，之後見止咗血，再行去藥房拎埋藥，我哋就急急腳飛的返學校，臨走前同老師交帶聲留意佢手臂有傷口，好彩到放學返來都無事（艾菲好怕佢又喺到喪R），呼~
其實自從轉咗學校，唔使再日日行長命樓梯，學校空間又多咗地方畀佢跑跑跳跳後，燒腩仔跌嘅情況係明顯有所改善，不過最近聖誕新年假，唔知係唔係玩得太瘋狂，瞓覺時間又少咗個人攰呢，佢又忽然跌得多咗，就連喺屋企行入廚房，明明行慣知有道閘喺門口，都可以踢到跌低幾次，宜家唯有望物理治療可以盡快開始，及早改善佢行路嘅問題啦﹗
沒有留言:
張貼留言