忽然迪士尼

聖誕節前忽然收到迪士尼sms，話十周年驚喜所有會員可以喺28-30/12入園（本身銀卡會員唔可以喺呢段時間入園）兼買嘢有七折，經歷過上次有人入到去發脾氣扭計之後，艾菲講過唔再一個人帶佢入去玩，本身真係無諗住同佢去，但米高忽然話要清假放咗30/12嘅下午，見好快有人來接更就畀多次機會佢啦﹗



我哋呢朝求其食咗D嘢就出門口，但搞吓東搞吓西再等吓車，入到去已經一點幾，兩母子都超肚餓要即刻搵嘢食，本來想搵間餐廳坐低慢慢食住等米高來，點知燒腩仔話想食返之前食過間火箭餐廳，咁艾菲見呢間最容易搵位同平D，就一於食豪D同佢一人一個餐唔使爭。



食飽見米高仲未入到來，就呃咗佢去排隊睇米奇幻想曲（本來係想睇新嘅魔法書房，點知呢日撞正佢壞咗搶修中又無得睇），今次終於無再喊驚又無睇到瞓著，真係有打開眼投入睇，算係有進步啦﹗



之後米高入咗來，燒腩仔第一時間話要玩車，但呢日始終係學校假期同近住聖誕新年，園內有超多遊客同family，所以平日等大半個鐘就玩得嘅車，呢日要等成個鐘，咁艾菲唯有自己去shopping睇吓嘢，見到呢D新出嘅新年禮盒幾靚，呢日仲有七折添，即刻買咗兩盒for來緊新年送禮用。



shopping完行返出去，見到聖誕米奇米妮出咗來，想話過去排定隊畀燒腩仔影相啦（佢呢日未入場已經話要同米奇同高飛影相），點知...又一早截咗龍（當時只係四點幾咋﹗），好彩仲有高飛同Pluto可以排，艾菲排咗大半個鐘，差唔多到時佢哋兩父子終於玩完車趕到過來，艾菲總算有D嘢交差啦﹗



影完相返入Fantasyland，燒腩仔又指住木馬話要玩，但明顯有人開始扭眼瞓又唔肯瞓，難為米高全程招呼呢位失控嘅小朋友，好彩佢上到馬堅係玩得開心姐。



玩完木馬，例牌係去隔離排埋咖啡杯，但今次有人專登揀中間隻杯來坐，所以艾菲係乜都影唔到㗎...



所以等佢哋出來，艾菲就捉咗佢埋去影呢隻唔識郁嘅咖啡杯補數。



雖然燒腩仔話想睇煙花，但由於米高第二朝返早，所以玩到六點幾我哋就準備走，然後行到出美國小鎮大街，遇到大堆人企晒喺到等睇Anna同Elsa亮燈儀式，見燒腩仔最近終於知邊個係Elsa，又只需等多十幾分鐘就有得睇，於是決定睇埋先走，點知...除非企正喺聖誕樹底，否則係人多到乜都睇唔到，就算用相機zoom盡都只係勉強影到Elsa個豆豉頭咋，燒腩仔就更加唔知發生咗咩事啦，跟住一出樂園唔使五分鐘，佢已經喺米高膊頭瞓著咗啦﹗