Lego寶盒

講完腳仔就輪到講手仔啦，燒腩仔嘅小手肌發展一向麻麻，加上個人都幾懶成日出口術要人幫，好多精細動作，連未足兩歲嘅表妹都做得比佢好，所以前年年尾睇BBG blog介紹呢個lego寶盒，艾菲第一時間準備一個畀佢玩。

呢個寶盒到底係咩來呢？詳情可以參考呢個台灣blog， 其實只需要喺個外國網站donwload同print D Lego 圖出來，剪開細細張，再準備相應數量同顏色嘅lego，畀小朋友跟住圖砌，既可以kill time，鍛練小手肌之餘亦可以訓練空間感，對燒腩仔來講相當適合，而且BBG媽媽教艾菲去皆旺商場地庫某間鋪仔到買lego，呢到廿幾舊lego按重量計只需廿幾蚊咋（唯一唔好係唔夠白色細lego，艾菲要用其他色代替，再自行喺圖到加工），成本極低呢﹗



前年年尾已經一早準備好嘅lego寶盒，因為燒腩仔D小手肌未OK拆唔到D細lego，所以一直拖到上年九月，燒腩仔姨媽問燒腩仔想要咩生日禮物，我哋先再拎出來畀佢試玩（當時掙扎緊要Lego Juniors定搖控車），終於喺接近三歲時玩到啦，教一次已經明點玩，仲話咁快跟圖砌好完全無錯，開心到佢呢﹗



細細盒帶出街都好方便，某日米高話想去飲茶，燒腩仔習慣等嘢食時玩車，但呢日就換咗個lego寶盒畀佢，砌好就叫佢畀米高檢查，等佢哋兩父子都可以親子吓，砌得好有爸爸讚，梗係砌得特別落力啦﹗



見佢handle到D細lego，我哋都覺得佢可以升呢去玩Lego Juniors（咁大個仲買Duplo感覺唔多抵），不過因為車迷實在太鐘意車，最終都係叫姨媽姨丈送架搖控車畀佢做生日禮物，但點都估唔到佢哋一直記住，仲喺聖誕節時送咗一大盒Lego Juniors畀佢﹗



無記錯Lego Juniors應該係Lego新出嘅line來，男仔女仔款都有，盒面寫話啱四歲以上小朋友玩，內裡全部係細lego，重點係佢有晒彩色圖畀小朋友跟住砌，感覺比正常嘅lego圖係易明D（艾菲都好多年無砌lego啦，所以已經唔太記得正常lego嘅圖係點），但艾菲拆盒後其實都研究咗一輪先夠膽拆畀燒腩仔玩。



盒入面係分number pack好一袋袋，所以艾菲先開第一袋出來，再畀本簡易版說明書（入面有另一本係深少少嘅）燒腩仔睇，因為D lego組件比較多，所以佢都要D時間慢慢逐件睇圖認返，而艾菲亦要一直喺側邊用把口PG家長指引，但佢堅係全程自己一手一腳砌，完全唔需要艾菲郁手幫忙就完成到，以一個三歲半未夠嘅小朋友，加上小手肌向來發展麻麻嘅人來講，艾菲覺得佢已經好叻仔㗎啦﹗嘻...