到燒腩仔呢個年紀，其實佢都唔太知聖誕老人係乜水，不過艾菲就決定畀返D童真佢，趁同佢一齊聽《Santa Claus is coming to town》時，剩機同佢洗腦話佢知只要小朋友乖，日頭唔扭計夜晚又肯乖乖上床瞓，咁到平安夜當晚聖誕老人就會來放禮物入佢隻聖誕襪到，如是者一連幾晚成功呃到燒腩仔早D上床瞓（佢前排幾乎晚晚都話唔瞓，成日搞到十一點幾十二點先肯瞓）。
米高一直唔係好buy呢D玩意，但俾艾菲話得多都好努力投入聖誕老人呢個角色，真係有四圍搵吓有咩糖果零食可以放落燒腩仔隻聖誕襪到，但眼見佢D同學嘅禮物包入面實在太多糖，艾菲逼不得意下都要stop佢，至於零食以外嘅禮物，我哋就一早有共識，喺屋企堆車海中搵兩架新車畀佢就算，亦咁啱燒腩仔真係同艾菲講想聖誕老人送車畀佢，呵呵呵...
終於等到聖誕節朝早瞓醒，燒腩仔一出房就衝埋聖誕樹，想睇吓聖誕老人送咗咩禮物畀佢，經艾菲提醒後先識去搵隻聖誕襪出來。
燒腩仔：唔...等我搵吓入面有D咩先﹗
艾菲有D衰，專登放埋D唔關事嘅聖誕帽同聖誕裝飾入去，等佢無咁易拎到D禮物，嘻...
燒腩仔：（搵咗陣之後）嘩？我搵到包糖呀﹗
至於佢最想要嘅車，艾菲就更加係塞到入襪底，誓要考驗佢嘅耐性﹗
燒腩仔：依？真係有架車呀﹗
燒腩仔：嘩﹗有兩架呀﹗聖誕老人送咗兩架車畀我呀﹗
大家睇佢個笑容，真係開心到呢，小朋友就係咁純真咁簡單，媽媽希望你可以keep住呢份童真唔好咁快變老人精呀﹗
揭曉咗聖誕老人送咩禮物畀佢之後，艾菲仲好衰咁專登要佢放返兩架車去聖誕樹下面，等Boxing Day夜晚返來先准拆來玩，真係估唔到一個小小人仔，一個聖誕可以收到咁多禮物，難為艾菲同米高都只係各自收到一份禮物仔咋﹗宜家呢一代嘅小朋友真係好幸福呢﹗
沒有留言:
張貼留言