最後一次＠迪士尼

明明星期三先來完迪士尼，點知唔夠三日我哋又再入來，講真艾菲都覺得自己有D瘋狂，但邊個叫艾菲自己大頭蝦，之前迪士尼寄咗張2-3/1嘅2 days pass來，話補返我哋少咗一個星期嘅特選周末，艾菲就一直懶理以為係月中嘅事，經米高嚇一嚇之後艾菲先捨得拎張飛出來睇，都有同米高傾過想放棄唔來㗎，不過呢次將會係我哋短期內最後一次入來（銀卡到月頭就到期），上次又睇唔到魔法書房同煙花，所以就同燒腩仔癲埋今次啦﹗



呢一朝米高又要返工，得艾菲同燒腩仔拍拖入場，但為咗可以睇得成魔法書房，艾菲都唔敢怠慢，一早同佢喺樓下食個late breakfast就坐地鐵出發，入到來差唔多一點，即刻直衝去魔法書房排兩點場，講真要燒腩仔企喺到呆等一個鐘，艾菲都有D怯怕佢唔合作，點知佢睇吓地圖撩吓前面兩個女仔玩，時間好快就過咗。



開show後入來第三次終於睇到魔法書房啦﹗（第一次入來畀人包咗場，第二次壞咗要搶修，到傍晚整好但5:30就要開始排7:45場，等咁耐就梗係放棄唔等啦）艾菲覺得幾好睇節奏好緊湊，但對燒腩仔來講就有D唔太知發生緊咩事咁，中間有D位佢都問艾菲D哥哥姐姐做咩，太大聲時又會話驚，好彩見到米奇出場就無事，最吹漲係有人出來時同艾菲講佢唔鐘意聽女仔歌（即Elsa首let it go呀）喎...



睇完show出來見就到parade時間，於是拉咗燒腩仔埋去坐低等，我哋坐咗喺第二排，燒腩仔都好乖咁邊食嘢邊等無扭計，到D花車出場時亦表現得好投入有同D卡通公仔揮手。



米奇車來到時，有工作人員邀請小朋友出去一齊玩，艾菲就推咗燒腩仔自己一個出去，起初佢都好興奮咁樣㗎，但因為艾菲要看袋無喺側邊陪住，佢到後尾係拎住條絲帶喺到發呆，O...



睇完parade米高終於來到，為咗完成燒腩仔同米奇影相嘅心願，我哋就決定排隊影相先再慢慢玩機動遊戲，亦咁啱喺到俾我哋撞到第一次入來迪士尼玩嘅Little K一家，燒腩仔仲超冤氣咁係咁叫住Little K個名，搞到本來唔太想睬佢嘅Little K最後都忍唔住笑，哈哈...



影到啦﹗影到啦﹗千辛萬苦終於都同米奇影到相啦﹗



影完米奇，燒腩仔話想影埋Pooh，我哋等米奇時見到隻Pooh好cool㗎，好彩到我哋影時換咗另一隻搞鬼Pooh出來，但代價就係要等耐少少囉﹗



Pooh Pooh一來就想攬燒腩仔，點知呢個小朋友唔知做咩專登擰轉面畀個背面Pooh，到攬住佢影相時個樣又扮到好委屈咁，但明明係佢自己話想影㗎喎，呢D少男心事真係好難觸摸呢﹗



影完相就梗係去玩機動遊戲啦，燒腩仔第一時間話要玩渣車，呢日條隊又係超長要等一個鐘，艾菲就喺出面呆坐到天黑佢哋兩父子先玩完出返來。



由於要等睇九點嘅煙花，所以我哋玩完車就去咗大冒險家餐廳食飯，食完見仲有時間就叫米高快手帶燒腩仔去玩轉彈弓狗，入夜後呢邊嘅人明顯係少咗，等咗三四轉就到佢哋，燒腩仔開車前好型咁同米高講「好似好好玩」，但開車後好快就話畀米高知佢「好驚」，kakaka...



咁夜無得同胡迪影相㗎啦，唯有同Andy D手抓板影返張相講bye bye啦﹗



八點出返去等睇煙花，由於個天喺我哋食飯時開始落毛毛雨，所以D staff講明唔使坐低睇，噢...即係又唔使旨意影到靚靚城堡啦...



雖然企得算前，但喺頭與頭中間睇煙花，影咗N張先有一張比較見得人，不過影靚相唔係今次睇煙花重點，最重要係滿足埋燒腩仔另一個心願，完滿結束呢一年嘅迪士尼之旅。