艾菲個肚一直都唔係好大，到宜家都仲未過34寸（應該仲細過燒腩仔同期），平日條牛仔褲當然一早就著唔落，但普通legging還可以嘅，再加埋之前陀燒腩仔時淘咗條大肚褲仲啱著，勉強都叫做夠著，但講到襯衫就點都好似買返條牛仔褲好，所以就淘咗條托腹牛仔褲返來，順手淘多兩條大肚legging，十幾廿蚊條legging，真心唔敢有咩期望，但著上身又OK舒服喎，而且最近天氣凍，落街包返實個肚係暖D，至於條牛仔褲亦的確係顯瘦款，著上身有返個腳型，都算唔錯。
淘開褲，反正搞集運就睇埋有無嘢啱BB豆豬，預產期係五月嘅BB豆豬，好肯定會係個馬騮妹，記得想當年都淘咗個手鈴同恐龍帽套裝返來親手整畀燒腩仔，為公平計都想整返D手作嘢畀妹妹，艾菲今次就揀咗整馬騮口水肩同馬騮妹鞋仔，睇圖好似幾靚咁，唔知艾菲幾時先會的起心肝整，又唔知整唔整到圖入面咁靚呢，嘻...
燒腩仔開始大個，好多時見大人用鉸剪剪嘢都想伸手埋來試，所以一直想買把安全剪刀畀佢專用，無奈喺香港都搵咗段時間，始終唔知邊把先啱佢，早排同妹豬媽傾開佢話淘咗呢把OK，咁艾菲又跟住淘返把畀燒腩仔，當然小手肌未係發展得好好嘅佢仲係用到姐手姐腳咁啦，但practice makes perfect嘛，艾菲唔介意畀D時間佢練習，另外喺同一間鋪頭見D大卡紙十張只需四蚊就又淘咗疊返來，用來平時整小手作或者做功課備用都好呀（佢學校成日話要搜集D唔同顏色嘅紙碎做功課，次次艾菲都要四出搜尋先搵到>.<）
同樣係訓練小手肌嘅好物，上次睇暲暲媽介紹完艾菲就即刻入手，燒腩仔向來對螺絲玩具無乜興趣，叫親佢做都出口術話唔得唔得，但你逼佢去做其實佢係做到㗎，而且呢個係佢至愛嘅車仔造型，砌完可以當車玩，所以都玩咗一排先被打入冷宮。
前排行書局見到有Usborne Big Book of English Words，見幾得意又學到英文就即管上淘寶搵搵，估唔到又畀艾菲搵到喎，仲要35蚊人仔一本咋（香港書局減價都賣百幾）﹗再湊之前嘅Wally熱淘咗兩本日版Wally返來玩，可惜燒腩仔係無乜耐性玩㗎，反而係艾菲自己真係會好認真咁搵返Wally出來。
燒腩仔兩歲生日時，佢姑姐送咗個動物園畀佢，但個動物園除咗一隻企鵝就無其他，咁艾菲見淘寶四十蚊左右有咁大堆動物，就淘咗set返來畀佢玩，不過實物感覺係有D醜樣囉，車迷燒腩仔就當然對佢哋無乜興趣咁啦﹗
艾菲同燒腩仔由上年十月開始，就一齊喺學校上親子圍棋班，對於一個三歲嘅小朋友來講，要佢好專心咁去捉棋當然係有難度啦，但艾菲都係志在畀佢感受吓氣氛，學吓守規矩同試吓畀人食棋輸咗嘅滋味，估唔到佢似明非明咁都勉強叫做識玩（真係好勉強嗰隻），咁艾菲就諗住買返套棋返來畀佢同爸爸捉（米高話自己識所以唔去上堂喎），本身學校棋會有得買㗎，但size太大兼有D貴，所以艾菲就喺淘寶淘咗呢套平D又可以摺得埋兼有磁石嘅棋返來。
燒腩仔到宜家夜晚仲係有著片瞓，但我哋已經計劃著埋僅餘半包片後就唔再畀佢著片瞓，又其實佢已經識自己起身話去洗手間（呢排仲晚晚半夜三更叫醒我哋話去VV添>.<），實際出意外賴濕片嘅次數唔係好多，所以長遠計都係淘定兩張大嘅隔尿墊返來（之前用BB床size嘅隔尿墊會移位，再加埋遲吓要留返畀BB豆豬用），睇落好薄但艾菲試過真係隔到水，而且背後有個橡筋位箍實張床褥，相對無咁容易移位安全好多。
臨近農曆新年，雖然陀住BB豆豬，但艾菲見呢排仲行得走得又入到廚房，個心始終想整D簡單嘢來送禮畀長輩，所以專登淘咗四個曲奇罐返來，仲淘埋福字封口貼紙，希望掣成品能夠以靚靚樣示人啦﹗至於右邊嘅係之前一次準備燒腩仔生日會時喺同一間鋪頭淘嘅，四款動物造型方型包裝袋，用來入曲奇餅送畀佢D同學好good fit，亦順手淘咗圓型嘅麵包紙托同曲奇印字模返來。
屋企三個鑄鐵煲都用咗一段時間，上面D clip開始有損耗，雖則話可以埋專櫃問姐姐免費拎，但無幫
襯就咁拎幾個clip，感覺有D核突，所以見淘寶有得淘，仲要一蚊人仔有十個（運費仲貴過件貨），艾菲索性淘一大堆返來慢慢用。
呢堆魚絲魚鈎係幫燒腩仔公公淘嘅，佢一向鐘意行山鈎魚呢D玩意，但又唔太捨得投資D裝備，所以見淘寶價錢咁平即雙眼發光，所以艾菲就叫佢揀啱通知聲，淘開嘢幫佢一齊淘就可以再慳返D運費啦﹗
記得上次講過畀黑店神州集運激到啤啤聲，艾菲當然死都唔會再用佢哋，咁呢兩次淘寶就要轉集運公司，無意中畀艾菲發現咗集運王，可以喺百家匯分店或自提點拎件（其中一個位直情喺艾菲屋企樓下），見佢價錢都算合理，而且可以匯豐過數唔使蝕信用卡手續費，所以呢兩次都揀咗用佢，一次送上樓一次自己拎，星期五晚confirm order，星期一已經有貨拎，感覺都OK D貨返到來唔會甩皮甩骨（雖然有人喺討論區話集得多會唔見貨），如無意外的話應該可以keep住用佢。
沒有留言:
張貼留言