呢日米高放半日，艾菲一早就諗好帶燒腩仔過海去接爸爸放工，所以一起身食完早餐，就換衫執袋出發，咁一場來到灣仔呢邊，艾菲個心當然係想去蘭杜街食蝦麵（嘻...其實米高唔係灣仔返工，係艾菲屈佢由老遠行過來），點知去到餐廳門口有個小朋友大叫「我要食飯」，艾菲呢個為食大肚婆慘被強頑嘅小朋友KO，只好乖乖行過隔離鋪食越南嘢，然後食得半碟飯嘅米高出來大叫要再搵嘢食，艾菲就帶佢哋去快樂餅店買包食，明明燒腩仔自己揀咗個菠蘿包做下午茶㗎，但見米高個沙翁又雙眼發光咁搶食咗大半個，米高最終都係餵唔飽自己㗎，噢...
之後我哋沿路行返出地鐵站附近，米高一早已經話想食公利蔗汁糕做甜品，佢一心以為呢個色呢個樣，燒腩仔應該會無興趣，可惜事實證明佢太天真啦﹗為食燒腩仔又出動搶食﹗連賣蔗汁嘅阿姐都忍唔住話「乜你咁細個都識食呢D嘢」，其實佢喺艾菲肚入面已經食唔少，以前放工間中會走去買個返屋企雪凍做飯後甜品，嘻...
食飽當然要搵D嘢做，難得過海最好當然係去中央圖書館睇吓書坐吓休息吓，本來見到電車站超多人想轉坐巴士㗎，但燒腩仔好堅持要坐電車，佢兩父子仲要一上車就直衝上上層，其實艾菲當時啱啱食飽，條腰忽然有D痛唔多企到，好彩有個姨姨好快發現到艾菲個肚讓座，同去到銅鑼灣有唔少人落車，艾菲先舒服返D。
呢日艾菲嘅感冒仲係未好，全日keep住鼻水長流，可能因為咁入到圖書館時又突然好眼瞓，好彩今次有米高喺到幫手講故事畀燒腩仔聽，艾菲就可以好安心咁坐喺對面休息叉吓電，我哋仲喺到hea到五點圖書館閂門先走。
睇完書出來無耐，燒腩仔就喺米高嘅懷抱中瞓著咗啦，我哋剩機喺銅鑼灣行咗陣街，六點半左右就去咗金鳳食地道嘅聖誕大餐，其實我哋以前拍拖間唔中都會來呢到食飯，記得N年前平安夜聽蔡瀾介紹後來食過一次呢個餐，感覺好地道好funny同OK好味，咁今年就決定帶埋燒腩仔來試，不過今年嘅聖誕大餐主菜係我哋都唔太啱食嘅豬脾，所以最終只係叫返招牌牛柳，而燒腩仔啦...就只係食咗個牛油餐包同N條薯條就叫飽，唉...佢呢排食親正餐都麻麻煩煩，畀肉佢都嫌要咬話唔食，我哋見佢有嘢落肚就算，都廢事同佢嘈。
食完聖誕大餐都係七點幾，我哋就按原定計劃，同佢去坐天星小輪返尖沙咀順便睇燈飾，往時艾菲一定會堅持行尖東海傍睇燈飾先最有feel，但今年陀住BB豆豬就一切從簡啦，坐船睇燈飾其實都一樣姐，況且一日之內有得坐過海巴士，電車同小輪，未開船燒腩仔已經話自己今日好開心。
落船後本身諗住沿彌敦道行落佐敦坐車走（因為封路），但見今年真係無同燒腩仔影過商場聖誕裝飾，點都逼一次入海港城影吓靚靚米奇聖誕樹同tsum tsum蛋糕啦﹗
因為人多到無可能走回頭路出返去，所以我哋就好順路咁入咗商場行咗陣街，然後行吓行吓去到海港城尾，發現封路只係封到中港城，見有巴士即跳上車返屋企，十點左右已經順利返到屋企休息，呢個平安夜認真平安呢﹗
沒有留言:
張貼留言