對上一次去Dr Wong到覆診前，艾菲又再問燒腩仔同樣嘅問題，但今次嘅答案就有D驚嚇啦...
艾菲：你估BB豆豬係妹妺定弟弟？
燒腩仔：妹妹﹗（超堅定嘅語氣）
艾菲：你好想要個妹妹？咁如果佢係弟弟點算？
燒腩仔：咁你咪再生過個囉﹗
艾菲：吓？（完全無諗過佢識咁講）爸爸媽媽唔會再生㗎啦喎﹗
燒腩仔：咁我會打死佢﹗﹗﹗
艾菲：打死佢？你點可以打死佢？你知唔知咩叫打死佢？你打死佢嘅話媽媽會好傷心㗎﹗就算BB豆豬係弟弟，你都要好錫佢先得㗎﹗（下刪幾百字輔導）
其實事後艾菲都有同燒腩仔傾過，佢應該係唔知咩叫「打死佢」，可能只係唔知邊到聽到人咁講，佢又照跟人咁講，所以大家唔使太擔心佢有暴力傾向。
講完燒腩仔嘅睇法，又輪到講吓艾菲自己嘅睇法，作為一子之母再有第二個，心當然係想要多個女湊個好字啦，始終女嘅感覺真係孝順D細心D識氹人D，而女人嘅直覺都話畀艾菲知BB豆豬應該係女仔來（同當年陀燒腩仔時一早覺得佢係男仔一樣），但諗深一層如果係男仔其實都好，我哋唔使煩大個分房瞓嘅事，佢亦可以用返晒燒腩仔D嘢慳返一筆， 照顧上其實係相對容易，所以對艾菲來講仔同女都OK，最緊要佢健康就夠。
至於米高呢，由於一直怕艾菲生個女出來，會發晒狂咁買衫同佢扮靚搞到佢破產，再加上怕結果真係仔嘅話艾菲會失望（乜艾菲個樣真係咁恨女咩？），所以佢把口一直都話唔信BB豆豬會係女，等艾菲唔好抱太大期望，但實情呢艾菲都同佢傾過，如果BB豆豬係女仔，佢呢個做爸爸嘅一定會變得好溫柔，至少唔會好似宜家對燒腩仔咁惡，兼受唔住BB豆豬嘅嗲功乜都應承囉﹗>.<
咁艾菲講咗咁耐我哋一家三口嘅睇法，到底BB豆豬使唔使俾燒腩仔哥哥打死呢？
嘻...經上次Dr Wong一照，其實已經九成confirm BB豆豬係妹妹來嘅﹗而照結構時王醫生都幫我哋double confirm多次BB豆豬確實係妹妹﹗
上次Dr Wong同艾菲照時，超聲波入面個V shape係清楚到不能再清，連Dr Wong都笑住講咗句「搞掂晒啦﹗」，但好笑嘅係艾菲同燒腩仔，可能係一早已經feel到BB豆豬係妹妹嘅關係，所以對於結果無特別興奮嘅表現，反而係米高返到屋企後，忍唔住問艾菲BB豆豬個性別會唔會仲有變（V到咁仲點可能有變），不過佢都好快已經接受咗自己個前世情人好快就會來搵佢嘅事實，而我哋亦好快已經改口，成日同燒腩仔妹妹前妹妹後咁講，宜家佢呢個八公仔已經識周圍同人講「媽媽肚入面有個妹妹，佢5月就會出世」啦﹗
最後送返張BB豆豬嘅腳板相畀大家睇，雖然個樣照估計應該似媽媽多，不過D手手腳腳就應該係同爸爸一樣，皆因佢同米高同燒腩仔隻腳一樣，好明顯係二趾長過公㗎﹗>.<
沒有留言:
張貼留言