DIY生日卡

記得細個時，艾菲嫲嫲每年生日，燒腩仔婆婆都會提醒我哋買生日禮物送畀老人家，艾菲覺得呢個都係一個好嘅教育來，尊敬同關愛長輩嘅message係要自小灌輸，來緊個星期五係燒腩仔婆婆六十大壽嘅大日子，我哋三個做仔女嘅就喺啱啱個星期日，請燒腩仔婆婆去食自助餐慶祝，咁做孫嘅燒腩仔都三歲大，係時候要做返D嘢啦﹗



同燒腩仔商量咗陣之後，佢都同意整張生日卡畀婆婆（梗係啦，婆婆平時咁錫佢），仲好興奮咁追咗艾菲幾日「有得整婆婆張聖誕卡未」:P，對於真係無乜美術底嘅艾菲來講，買現成嘅生日卡畀燒腩仔吸個名印貼吓貼紙就最方便，但諗吓諗吓又覺得無乜誠意咁，反正之前淘咗D大卡紙返來，正好係呢D時候用啦﹗

要畀一個只得三歲未識寫字嘅小朋友DIY生日卡，艾菲都諗咗成晚先諗到點搞，終於決定簡簡單單只畫一面，先將張卡紙用狗牙剪剪成所需size，然後簡單地喺上面畫個雙層蛋糕嘅圖案，之後就交畀燒腩仔負責填色，平時佢放學返來做功課都有時做到無心機hea做，難得今次佢係異常地興奮同用心喎，雖然都係油到出晒界，但艾菲覺得可以接受啦﹗



填好色就叫佢幫手用貼紙貼返Happy Birthday字樣，另外再貼一個6同一個0喺蛋糕頂扮蠟燭，貼好艾菲就用marker幫佢喺60字樣上畫蠟燭芯，再捉住佢手仔用手指畫印兩點燭光落去。



最後叫佢自己吸返自己個名印，艾菲幫佢用筆寫返上下款，咁就大功告成啦﹗雖然唔係好靚，但都叫做一番心意啦﹗



張卡整好咗幾日，終於到星期日可以送畀婆婆，但燒腩仔係超心急，婆婆都未坐定就塞咗畀佢，又唔識送卡時講多句生日快樂同送香吻，呢個小朋友真係一D都唔sweet㗎﹗kakaka...

食飯呢晚係呢排最凍嘅一晚，眼見D雨一直落唔停，真心凍到完全唔想出街，但為咗婆婆都要衝出門口，我哋今次揀咗去食自助山，book之前唔知children's policy呢單嘢，如果早知一定唔再去（畀晒deposit無得揀），但去到艾菲都第一時間叫佢個waiter拎走張卡以示不滿，講真你點可能要求一個小朋友甚至BB全程乖乖唔吵鬧，燒腩仔已經算坐定定嘅小朋友，都會不自覺講嘢大聲咗，但其實隔離枱堆姨姨高談闊論咪仲大聲仲滋擾﹗

講返食物，質素好似無上年年初去食咁好，熟食選擇無上次去咁吸引，最出名嘅燒味略嫌唔夠熱同咸，至於冷盤就叫做keep到，艾菲都終於忍唔住破戒食咗隻生蠔同一粒帶子刺身（上次陀燒腩仔艾菲係唔戒口㗎，但無奈呢排李斯特菌case太多，唔到你唔怕），堅係好好味囉衰鬼，最值得一讚就係枝棉花糖，棉花糖中間枝棒棒係會閃閃發光同拎得走㗎，用來氹燒腩仔呢D小朋友就最good啦﹗