一切安好（24W）

以為捱過最凍幾日咁叻豬會有運行，點知兩日後回暖即中招，大傷風勁流鼻水兼喪咳，到宜家仲係咳到甩肺咁滯，被逼休息幾日咩都做唔到，好彩星期六朝米高幫手帶燒腩仔返興趣班，等艾菲可以抖返半日，燒腩仔今日又乖乖肯陪艾菲瞓咗兩個鐘晏覺，叉吓電總算好少少，預計來緊一星期會忙到爆廠（唔好問忙咩，其實艾菲都唔明點解每個農曆新年前都咁忙，重點係已經唔諗住大掃除），連本來諗住上星期整嘅揮春都仲未郁過，刻不容緩都係寫咗上星期BB豆豬去覆診嘅嘢先，否則應該唔知會拖到幾時先記得再寫。

星期一下午，離開青衣公園後我哋就直接坐車出尖沙咀覆診，呢日診所超多人，入到去連想搵個位坐都難，照例都係登記，量血壓，磅重，同驗小便，so far血壓同小便都正常，重量應該都OK，到目前為止只係重咗12磅左右， 至於個肚就仲未過34寸，試過喺樓下撞到兩pair街坊朋友（米高兄弟），完全無人發現艾菲有咗（我哋到宜家都無特別同親友講），連燒腩仔D同學仔媽咪都睇唔出艾菲個肚，係燒腩仔走去同同學仔講「我媽媽肚入面有BB」，先忽然畀同學仔媽咪發現...

不過個肚唔大，肚紋嘅危機就已經四伏，呢排天氣乾燥，個肚係長期處於超痕同甩皮狀態，已經密密搽肚紋膏保濕，但基本上半個鐘後又打回原形，沖涼時更清楚見到一條條充晒血嘅血管，真係唔到艾菲唔擔心個肚皮今次保唔住，而另一樣令艾菲好唔舒服嘅就係鼻敏感，上次陀燒腩仔頂多係間中流鼻血，同後期瞓覺時有透唔到氣嘅情況出現，今次就好早期已經瞓覺時覺得透氣唔舒服要墊高瞓，更加係鼻敏感嚴重咗好多，幾乎每朝都邊打乞嚏邊同燒腩仔刷牙洗面，特別係早幾日凍就更加嚴重。

入返正題講覆診，呢日等咗大半個鐘先有得見醫生，好彩唔使返學嘅燒腩仔心情大好，喺出面等嘅時候都算合作無扭無大叫，入到房又識大大聲叫醫生叔叔，仲走去同Dr Wong講自己喺青衣過來，同埋話自己有個新嘅McQueen水樽，見佢咁口乖Dr Wong都有同佢吹咗兩咀，但佢兩個都應該係本身就溝通唔來㗎啦，哈哈哈...

Dr Wong先同我哋睇返之前個結構報告，解釋BB豆豬一切正常，然後就埋位照超聲波，例牌睇頭，睇肚，睇腳骨，睇眼球，聽心跳，結論係BB豆豬一切安好，已經有磅幾重（Dr Wong話出世時通常會重過第一胎），臍帶暫時無纏頸，頭仔仲未調落下面，艾菲笑指今次真係想理都無乜時間理BB豆豬，Dr Wong即安慰艾菲，話事實證明就算唔理佢都會自己正正常常咁大，而且第一胎難湊第二胎通常會好湊好多，really？係艾菲就唔使咁驚啦﹗

另外，艾菲都有問點解BB豆豬今次嘅胎動位置咁低，成日喺近膀胱位置撩吓撩吓好唔舒服，感覺係佢D手手腳腳隨時會跌出來咁，Dr Wong就話呢個係第二胎常見現象，皆因陀過一次BB子宮已經鬆咗，所以感覺會陀得低，佢就建議艾菲可以考慮用托腹帶，等佢唔好墜得咁辛苦（佢又講得啱喎，有時行得耐，真係覺得條腰好墜），無奈宜家個肚用咗托腹帶都托唔到D咩，所以艾菲仲係未開封到條托腹帶。

照完超聲波，就同Dr Wong約定二月尾再覆診，順便叫佢寫封信去QE拎個血報告同Oscar報告，講開來緊星期六要去QE飲糖水，艾菲話好驚會唔pass，因為最近檸檬茶癮都幾大（宜家成日畀燒腩仔激完就會想飲返盒來平衡吓），Dr Wong就話唔唔使擔心可以照飲，叫艾菲呢個星期少食飯之類嘅澱粉質就OK。



今次見完Dr Wong同BB豆豬，雖然無咩特別事發生，但感覺就比之前照完結構更踏實（可能係已經到咗24W，真係有咩事都一定要生出來啦），所以呢個weekend經過開駱駝漆大廈，就先買咗包Pigeon日版乳墊（米高都有問艾菲做咩咁急買，但又唔買產婦用M巾喎，咁艾菲就話呢包嘢堅好用，又唔係周圍有得買，同埋艾菲真係好難估計幾時開始會有需要用嘛，上次係未生之前已經有需要啦），然後今晚路過Megabox Aeon見有折上折，都買咗兩個Pigeon儲奶樽同Avent奶咀，加埋燒腩仔姨媽畀嘅幾個medela儲奶樽同大堆儲奶袋應該夠用，至於奶樽就十五十六唔知買幾多好（艾菲主力想埋身餵，但又怕BB豆豬似哥哥咁唔識飲），最終都係決定遲D先算。