行年宵＠學校

年廿六，亦係燒腩仔農曆新年前最後一日返學，學校一早安排咗行年宵嘅活動畀大家玩，仲叫大家一齊著華服返去應吓節，點知燒腩仔早一日忽然發燒（其實艾菲病完都一直擔心佢中招㗎啦，唉...），到第二朝仲有少少低燒，keep住食藥就退唔食藥又燒咁，正常情況下艾菲應該係會同佢請病假唔返學，但佢呢朝係超精神咁喺間屋走來走去，艾菲話同佢請多日病假即大叫「唔好」，好堅定咁話自己好返同好想返學校玩（之前一日問咗妹豬媽，畀佢知道呢日會有好多嘢玩啦），的確難得一次嘅行年宵活動，錯過咗係好可惜嘅，所以同米高商量後決定搏一搏，畀佢食多劑退燒藥同帶好口罩先准出門口，亦感恩佢之後真係成個下午同夜晚都無再燒，呼～



佢哋返到學校無耐，已經有做義工家長嘅同學仔家長send相過來，睇到成班小朋友著晒華服，cute到不得之了，而學校就超好心機，真係好似年宵市場咁set好晒一個個booth，畀小朋友排隊埋去玩，而每個小朋友都獲分配一定數量嘅假錢來買嘢，單係睇相已經覺得好好玩啦﹗



除咗買嘢之外，小朋友仲可以試吓搓湯圓，又有得玩獅子仔同輪流舞師，睇到艾菲自己都好想玩埋一份，放學返來問返燒腩仔，佢都話學校年宵好玩過維園年宵囉，kakaka...



艾菲喺屋企苦等咗成個下午，到底燒腩仔用佢嘅假錢買咗D咩返來呢，哈哈...就係上面呢堆嘢啦﹗佢話有D係佢自己整，有D係就咁買，糖就應該係同學仔同老師送。



嘻...最sweet係平日對艾菲呼之則來揮之則去嘅燒腩仔，原來玩得咁開心都無唔記得媽媽，忽然喺書包到拎呢條手鏈出來話：「我整咗條手鏈畀你呀」，雖然都搞唔清係佢親手串定係家長義工幫佢串，但單係佢有呢份心就已經夠啦﹗



而更大嘅驚喜，就出現喺艾菲喺廚房忙緊煮飯時，忽然佢拎住一大盒車（個盒本身係艾菲拎來畀佢泊車用）走來廚房門口大叫：「媽媽，呢份禮物係送畀你㗎﹗」即刻問佢咩事要送禮物畀媽媽，原來係老師教佢過新年要送禮物畀長輩，除咗呢樣仲有教要雙手接利是同長輩請佢食嘢時要講多謝呢D，估唔到學校又幾有心喎，佢哋講一句好過我哋家長講十句，即刻入晒腦，讚讚讚呀﹗