飲糖水（25W）

由於燒腩仔公公有糖尿病，所以艾菲係屬於妊娠糖尿高危人士（之前燒腩仔姨媽係中咗㗎），第一次去QE見姑娘時，就已經畀咗個期艾菲喺年廿八返去飲糖水（糖水一般係26-28W去飲，不過艾菲個預產期係改遲咗幾日，但QE話唔超過一星期佢哋都跟最後一次經期計）。

呢胎無上次陀燒腩仔時咁大食，但就超鐘意食垃圾食物，杯麵薯片汽水之類嘅無益嘢，艾菲係完全無戒，仲要年廿七晚返咗娘家食團年飯，所以做test前只係戒咗一日白飯咁大把，雖則上次見Dr Wong時佢話應該無咩問題（BB豆豬size唔特別大），但心入面點都有少少怯。



凌晨十二點開始戒口，水都唔敢飲太多，然後第二朝未九點已經到咗QE（9:15嘅booking，不過怕好似上次喺健康院咁搞到十二點幾先有得走，所以專登早少少到），一到二樓就有個阿姐指示跟住排隊（完全無睇你係幾點期），9:10左右已經可以入抽血房抽第一次血，然後出來就埋counter位拎呢枝傳說中嘅糖水。

人生中第二次飲糖水，老實講艾菲唔覺得難飲，暖暖地又甜甜地咁啦，飲完亦無反胃嘅感覺，只係keep住要去洗手間，不過眼見其他明顯係第一次飲嘅媽媽飲之前好驚嘅表情，甚至畀隔離嘅老公嚇，真係忍唔住笑。

飲完交返去counter到，阿姐就會畀個時間你幾時去抽第二次血，兩小時內無得離開醫院同食嘢，咁艾菲都早有準備，一早帶定書去慢慢睇，不過啦...真心覺得宜家D人無乜公德心，雖則呢到唔係圖書館本身有開電視，但都唔好任由小朋友開住speaker大大聲喺到睇普通話卡通嘈住人啦，其實呢個世界有樣嘢係叫耳筒㗎，終於坐咗大半個鐘艾菲都忍唔住要轉個稍為寧靜嘅位繼續坐落去。



差不多到11:15，counter阿姐就勁好人咁提第一批嘅媽媽去排隊準備抽第二次血，艾菲係遲五分鐘嘅第二批，所以等咗陣之後都好快埋咗去排，登記完入到抽血房啱啱好係11:20，然後出返來交返牌板去couner位，阿姐就會每人派一包梳打餅同鈣思寶，仲驚我哋餓咗成朝會暈低力勸我哋食埋先走，真係服務好到唔畀個讚QE都唔得呀﹗

相比起上次喺健康院搞到十二點幾差唔多一點先有得餓住肚走，今次11:30都未艾菲已經行到落佐敦，感覺實在係好到難以置信﹗然後一早約好米高同燒腩仔出來食返餐好順便落花墟買花，仲放肆到叫咗杯凍檸茶畀自己飲，之後幾日新年更加係食得毫無避忌啦，然後等到今日都兩個星期仲未有電話，艾菲就當自己pass咗呢關㗎啦﹗嘻...