拆利是

一年一度元宵佳節，連燒腩仔學校都叫大家著華服返去慶祝，可惜呢個小朋友星期六朝又忽然起燒，一燒就三日唔停，呢日唯有病假一天留喺屋企休息，然後成日無嘢好做又唔願瞓，同佢用泥膠搓咗D粒粒扮湯圓（艾菲都有係咁易同佢介紹吓咩係元宵），跟手就拎晒佢D利是出來拆啦﹗



拆利是似乎係每個小朋友最著緊嘅一環，一聽到有得拆利是，燒腩仔即刻收好晒D玩具等艾菲，而為咗令件事變得更有意義，艾菲就要佢幫D利是封做返配對，將一樣嘅封放埋一齊先准拆，起初都有心機做㗎，但對吓對吓開始同艾菲講佢「搵唔到」兼走咗去（因為個量其實都幾多），氹到口水乾先終於完成到。



做完配對梗係即刻郁手拆利是﹗今年終於無拆爛個利是封啦（不過有D都畀佢整皺晒）﹗拎完D錢出來仲識分係$20，$50，$100定$500，再逐張攤平放好無整亂，感覺真係大個仔咗好多﹗



至於未出世嘅BB豆豬，都喺呢個新年唔覺唔覺逗咗唔少利是，呢D利是錢暫時會由艾菲代為保管，頂盡放到出年新年後，就會同佢去燒腩仔用開間銀行開個戶口存入去，始終呢D錢銀嘢都係同艾菲或燒腩仔獨立分開計會好D。



而為咗令燒腩仔對錢有更深嘅認識，等埋米高放工返來食完晚飯，我哋就畀咗放全盒嘅$4利是錢佢，同佢落樓下間超市睇吓有咩買，但原來宜家$4真係買唔到D咩（如果多一蚊應該會好D），最終佢只係買到一包價值$3.8嘅嘉頓威化餅，我哋仲第一次畀佢自己喺個袋到拎錢畀收銀姐姐找數添，咁啱收銀姐姐又好配合我哋喎，係咁叫佢袋好找返來嘅兩毫子同張單（只限平日夜晚無咩人先咁好咋），之後燒腩仔就珍而重之咁拎實包餅返上樓啦（兩隻手拎到實一實，仲話無手拖我哋添呀>.<）﹗



話晒都係元宵佳節，燒腩仔又喺傍晚時份終於退晒燒，呢晚點都要食返粒湯圓應吓節啦﹗

燒腩仔：唔...粒湯圓好好味好甜呀﹗你今日甜咗未呀？