Move On（30W）

無端端消失咗兩個幾星期，有add艾菲facebook嘅朋友仔都應該知，艾菲喺呢段日子病到五顏六色一D都唔好受，認真咁大個女都未試過咁徹底地打敗仗，先係畀燒腩仔D惡菌傳染，連燒四日食足咁多日panadol先退到燒（呢個紀錄已經超越咗當年乳腺炎高燒三日），再來就忽然喪咳唔停，咳到hehe聲同豬叫咁嘅聲，咳到嘢都無氣講，咳到連續幾晚瞓唔到，咳到無胃口無晒味覺，咳到不停嘔痰，咳到全身肌肉都痛，咳到懷疑自己就來死，最死係keep住低燒唔退...

最後捱過咗個無藥食無得抖嘅weekend，終於喺上星期一晨早八點幾爬落去樓下家庭醫生到呆等個幾鐘先有得見醫生（呢排診所超full，閒閒地都等成兩粒鐘先有得見醫生），醫生一聽即話如果唔係有BB豆豬佢實捉艾菲照肺，然後診斷艾菲為氣管炎，要開抗生素畀艾菲，好彩嘅係食咗一日藥之後艾菲已經瞓到，宜家完成晒成個療程，總算好返六成左右，D咳未完全停晒，但至少夜晚係瞓到同收晒鼻水同痰先。

而喺艾菲病到死吓死吓咁嘅兩個星期，BB豆豬亦默默地踏入咗一個新里程碑，就係足30周大啦（一定要今日寫，因為聽日已經係31W啦>.<）﹗真心艾菲好欣賞BB豆豬嘅生命力，無論艾菲點燒點咳點食唔落嘢點頹廢都好，佢一直都無放棄過長大，每日keep住不停喪踢，有晚艾菲瞓唔到唔開心到喊出來咁滯，佢仲好搞鬼咁畀艾菲捉咗手仔兩次添，即時將艾菲由灰到盡頭拉返上來。

雖然仲未揀定開刀嘅日子，但如無意外我哋仲有八星期就會見面，至於體重好神奇地只係重咗十三磅左右，甚至覺得手手腳腳都比之前瘦咗（之前新年帶返隻結婚戒指去拜年，隻戒指係鬆到濕水後好易跌出來），肚圍就終於有所增長，由上星期35.5寸連一齊等校車嘅媽咪都仲唔覺艾菲有咗，到今個星期忽然標升到37寸凸晒出來，最怕佢爆嘅肚紋經歷過咁多次天氣轉變都無爆到出來（touch wood），但腰痛就變得越來越嚴重，宜家基本上出街唔可以唔帶托腹帶，亦唔可以行太耐更加唔行得快，甚至連彎低身著鞋都開始覺得有難度。

眼見自己越來越輪盡，米高來緊月底又要出trip，所以病好後都唔敢偷懶，開始著手準備BB豆豬D嘢，已經喺燒腩仔姨媽到拎咗四大袋紅白藍嘅BB嘢返屋企，買好入院用嘅走佬袋物品同BB豆豬嘅日用品，吩咐咗米高過到日本幫手買埋D濕星嘢，亦喺家庭醫生到成功拎到罐初生奶粉旁身（宜家呢個時勢，要拎罐初生奶粉原來係件好難嘅事來），來緊就要開始進行全屋大清潔，洗BB衫，執BB床，洗BB車同high chair，最重要當然係執走佬袋同BB豆豬出院嘅衫啦﹗

另一同樣重要嘅嘢，就係除咗安排入院五日照顧燒腩仔嘅事宜，仲要事前同燒腩仔做足心理轉導，其實經過今次艾菲病足兩個幾星期後，我哋都叫做體驗到佢會有幾惡搞，基本上佢係用咗成個星期時間，先叫做接受到艾菲病咗陪唔到佢嘅事實，每日都超hyper勁唔合作，上一秒完全正常下一秒就搵嘢來扭同嘈，平日一D好基本嘅嘢會故意唔合作，趁住艾菲無氣時來同你拗唔停（基本上艾菲點解咁耐都唔好返，唔多唔少都同湊住佢有關），最攞命係夜晚叫佢瞓覺，先係扭唔瞓嘈一大輪，再來係一個鐘內出房超過五次，理由包括急V（但明明五分鐘前先去完㗎喎），跌咗個公仔（明明自己執到），濕疹痕（臨瞓前先搽完cream），唔想瞓（基本上咩理由都可以有）...到半夜又醒幾次坐喺床到發脾氣大叫，搞到米高都無晒耐性忍唔住同佢嘈。

有見及此，艾菲都分別同米高同燒腩仔好好傾過，當然話佢哋時兩個都話明話知話會合作，到實際應運起上來，艾菲估到時要打個一折，已經預計BB豆豬返屋企初期會晚晚家無寧日，但艾菲知道燒腩仔心底裡，都係錫BB豆豬同期待BB豆豬嘅來臨嘅，希望到時自己都要有足夠嘅耐性同energy去陪燒腩仔，艾菲明白捱過最初嘅黑暗日子，就一定會見到𥌓光嘅﹗希望到時一切順順利利啦﹗