一入房，姑娘先叫我哋坐低，簡單問吓燒腩仔嘅家庭背景同情況，講到一半姑娘就同燒腩仔做測試，不過呢個燒腩仔可能因為啱啱病好，食咗幾日藥又或者係唔夠瞓，呢朝有D hyper失控，姑娘叫佢跟住做翹手翹腳嘅動作，佢做到一半就停低唔肯繼續做，要姑娘話做完可以玩，先終於完成到。
之後姑娘就帶燒腩仔入軟墊位置，試咗行樓梯，腳尖行，雙腳跳，單腳跳，由高處跳落地，同來回跑，之後又要佢聽住指令爬攀爬架，最後就叫佢用腳踢波同做一D用手傳波接波嘅動作，全個過程大概用咗四十五鐘左右，期間燒腩仔太失控都中場休息咗兩次。
最後姑娘同我哋做個簡單總結，話佢仲係有入字腳問題，不過呢個情況常見於七歲前嘅小朋友，相信佢會自行調節唔使太擔心，至於大肌肉嘅問題都唔太大，完全乎合到三歲嘅要求，甚至踢波時見到佢有一吓係識得自己轉身去就個波來踢（如果唔識嘅係會用手去擺好個波先再踢），證明佢眼腳協調係OK無問題。
不過出奇地，係傳波拋波嘅動作就唔合格，評估完只得兩歲左右嘅level，佢到宜家都未係好識拋波掟波嘅手勢，相信同我哋少同佢玩拋接波有關，但練習多D情況應該會有所改善。
至於艾菲最關注佢成日跌嘅問題，姑娘就話都留意到佢間中有呢個情況，同好多時雙腳跳時佢會分腿落，或者最後連pat pat都落埋地，呢個係position感覺嘅問題，應該係佢自己覺得個行路姿勢唔啱唔順，所以就會跌落地作個調整再來過，亦相信同佢平日鐘意有嘢依旁個身有關（佢係好鐘意挨身挨勢無乜腰骨）。
姑娘建議我哋一個月後再返去覆診，期間我哋可以同燒腩仔多D練習雙腳跳同單腳跳，例如畀佢夾住個公仔喺腳到跳，等佢跳時唔好分開腳落地，平日都盡量要避免畀佢挨身挨世，等佢慢慢習慣隻腳行路要用力，唔好成日唔拎起腳行路，希望下次覆診時會有所改善啦﹗
做完物理治療，我哋就去咗燒腩仔學校附近飲茶，食佢至愛嘅馬拉糕，不過呢個小朋友keep住都係心情一般，成朝都係扭扭擰擰咁超難服侍，好彩艾菲問返佢物理治療到好唔好玩時，佢都仲會答好玩，至少唔係抗拒先啦，或者下次覆診就會變身另一個人。
食飽我哋就送燒腩仔返學校，路過一間就來執嘅超老牌童裝鋪頭，其實早幾日喺同學仔媽咪嘅whatsapp group已見到有人提話佢七折大減價，最平嘅$20一條褲仔都有，見仲有時間就入咗去逛，竟然畀艾菲發現咗呢幾包原價$69嘅日本製紗巾，竟然減到$49六條，除返開十蚊都唔使，即刻掃咗3 pack返來畀BB豆豬，然後諗吓諗吓我哋應該仲差奶樽就無咩好買，定還是我哋隔太耐已經唔記得要買D咩呢？嘻...唔理啦...遲D再算啦...（果然第二胎係無咁緊張同上心>.<）
沒有留言:
張貼留言