繼續紅假第二日，睇完《功夫熊貓》出來，見個天真係好到不得了，艾菲實在忍唔住要帶燒腩仔出去玩，諗來諗去忽然挑起條筋想帶佢去東華個嘉年華玩，呢D燒錢嘅活動向來唔係艾菲杯茶，但唔知點解硬係好想趁BB豆豬出世前爭取時間陪佢玩多D，等佢好好享受同爸爸媽媽獨處嘅時光，難得米高又唔反對，咁我哋就go go go啦﹗
我哋喺九龍灣出發，但去到德福個小巴站，眼見條人龍長到等十架車都唔知上唔上到，由於艾菲已經預告去到門口要再排一輪隊先入得場，米高就決定轉軚坐的士過去，好彩去到門口條人龍又唔算好長，而且職員見到艾菲大肚，帶咗我哋去排條特快隊，所以等咗大概十五分鐘已經入到場。
入到場，可能係人多有D嘈加上太陽曬，燒腩仔又開始有D扭擰，唔係叫住去洗手間，就係顧住食艾菲袋入面包餅，樣樣遊戲都好似唔多有興趣咁，直至見到有得揸電動車先叫做好少少，但排隊期間都係keep住唔多耐煩，認真有D掃慶。
我哋喺場內好隨意咁行咗一圈，大概睇咗有咩玩先入錢增值，而Hot Wheels呢個area基本上係車迷朝聖區，有得揸電動車，交通安全城，彈床，任玩Hot Wheels賽道加埋任玩Mega Bloks，真係完全無得輸，於是有個慈母幾乎癲咗咁想畀$180買任玩套票畀個仔（只限呢個area嘅遊戲），好彩有個冷靜嘅爸爸喺到勸止，咁佢都解釋得好合理嘅，我哋成三點先入場，又唔係打算玩到夜晚，呢日假期排隊條龍實長，任玩都唔慌玩到幾多次，不如畀燒腩仔玩一次揸電動車就算。
車迷必玩嘅電動車，排咗大半個鐘先有得玩，排隊時燒腩仔已經揀定要揸黃色車，亦好彩佢咁啱係同組第一個入場可以任揀，入場前職員都有問我哋使唔使搖控，米高就話燒腩仔大個應該控制到所以無拎，結果呢...佢唔知係真唔識定假唔識，全程當咗架車係碰碰車咁玩，不時出現直路扭軚撞牆，同專對住人哋車尾來撞嘅情況，真係辛苦晒全程喺後面幫手救車嘅米高呀﹗kakaka...
揸完電動車，我哋本來諗住入去玩Mega Bloks（因為無買任玩套票，所以講好只玩呢兩樣），但燒腩仔去完洗手間返來忽然反口，指住出面個BB版過山車話要玩火車（已經係第二次講想玩），同佢傾咗一輪講好數，艾菲都心諗砌積木喺屋企砌都得啦（實情係米高想自己去玩同hea所以猛叫我哋入去半個鐘慢慢砌積木），難得佢有樣嘢係咁堅持想玩，至少玩完應該好開心吖，所以都唔介意加錢畀佢玩過山車（過山車未夠120cm高要大人陪，所以要畀多個人錢）。
燒腩仔要玩過山車，米高就自然無得走，反而畀咗個機會艾菲四圍行吓hea吓（但其實都無咩好睇啦）， 佢哋兩父子等咗差不多一個鐘先有得玩，事後米高講返燒腩仔喺排隊時，每次開車都好興奮咁叫米高抱起佢睇，到自己坐上去第一圈準備衝落去時，就不停同米高講「好驚呀」，但到第二圈已經笑到見牙唔見眼啦﹗
等到佢哋玩完出來，無份玩嘅艾菲一早企定喺出口到迎接，一問燒腩仔好唔好玩，即畀呢個開心樣艾菲，仲勁長氣咁不停講返架車會上斜然後衝落來，呢D反應咪就係艾菲想要嘅嘢囉，咁先似係去嘉年華玩㗎嘛﹗
一齊懷住開心嘅心情離開，你快樂所以我快樂，阿媽都好簡單㗎咋﹗
走嘅時候米高問艾菲想行半個鐘出返Mega Box，還是坐免費巴士出油塘，艾菲二話不說揀咗巴士，寧願兜個圈走都唔想行出去，而等車期間難得見到日落（呢排天氣咁差真係好耐無見過），艾菲仲忍唔住手痕幫燒腩仔影咗張背光相添﹗
沒有留言:
張貼留言