燒腩仔對上一次入戲院睇戲，已經係上年農曆新年嘅事，以為隔咗咁耐佢應該唔記得，點知佢新年前某一日經過樓下戲院，忽然同艾菲提起入過去睇叮噹，仲話想再入去睇多次添，艾菲心諗BB豆豬出世之後，確係無乜機會同佢入場睇戲，所以新年假時已經密謀同佢去睇，可惜最終因為太忙而無咗件事，咁今次復活節假佢放成十三日，無得唔兌現承諾啦﹗
一早同燒腩仔約好復活節假頭兩日（紅假前），我哋兩母子拍拖入場睇戲，當時只知有《功夫熊貓》呢套卡通片，見佢本身都鐘意熊貓，呢排又勁玩開心樂園餐送嘅《功夫熊貓》玩具，咁艾菲就揀咗呢套，燒腩仔仲醒到睇完poster知道套戲17號上畫，就日日提住17號去睇《功夫熊貓》（次次艾菲都要同佢解釋一輪，係放假先睇唔係17號就睇），搞到艾菲想縮沙走數都難。
米高喺假期前忽然通知個trip取消，四日紅假會留返喺香港，艾菲當然即刻邀請佢同我哋一齊睇啦，多個人幫手湊住燒腩仔嘛:p，於是同燒腩仔講遲多兩日等埋爸爸先睇，好彩佢OK仲話唔想自己一個坐要爸爸抱，即買兩張大人飛就可以一家三口入場，於是我哋喺紅假第二日，一覺瞓醒食完早餐就換衫落樓下戲院睇戲啦，而米高仲好好咁請佢食爆谷添，呢D嘢媽媽就唔會做啦，嘻...
我哋早咗少少入場，正當大家食住爆谷，諗住好好享受呢個親子時光之際，戲院螢幕就播咗《魔幻森林》嘅trailer，睇完之後莫講話燒腩仔，連艾菲自己睇見隻老虎撲出來都覺得有D驚，然後再望望燒腩仔個樣，好一副喊驚樣。
緊接落來就係《功夫熊貓》嘅開場，點知一開始就係壞人出場嘅打鬥場面，睇唔慣打交戲嘅燒腩仔（我哋平時好少開電視佢睇，如果咁啱有打交位都會轉台或唔畀佢睇），直接了當同我哋講咗句「好驚呀，我唔想睇啦」﹗
好彩打完之後就輪到功夫熊貓搞笑出場，再加埋有爆谷塞住佢個口，總算平伏返個心情，但佢全程都唔多投入，睇到中段仲同我哋講「好眼瞓想返屋企瞓」，雖然最終佢都坐定定睇晒全套戲，但到尾段就伸晒懶腰猛問「係唔係完啦」，似乎佢真係唔多enjoy呢套戲。
事後米高都有問點解艾菲唔揀《Zootopia》，佢覺得燒腩仔無睇過《功夫熊貓》 1同2，所以先咁唔投入，但實情係艾菲知道有《Zootopia》呢套戲上之前，已經約好咗燒腩仔睇《功夫熊貓》，基本上無機會再轉睇第二套，而且艾菲諗住《功夫熊貓》都係搞吓笑開心吓講吓練功夫姐，簡簡單單唔用腦都得，完全唔醒起佢堅係有打鬥場面而燒腩仔又會驚囉（無做功課連trailer都無望過嘅後果>.<）﹗
不過真心你問艾菲，艾菲覺得套戲都OK㗎，而且都有少少messgae帶到出來，只不過有D位未必啱細膽嘅燒腩仔，事後艾菲問返燒腩仔，佢都講得到D笑位出來，又記得壞人個名兼佢嘅特徵，即故事大概講咩都有入到腦，艾菲覺得已經係值回票價㗎啦﹗
沒有留言:
張貼留言