K1觀課日

家長日後兩星期，就係燒腩仔學校嘅觀課日，呢日艾菲啱啱完成晒成個抗生素嘅療程，總算病好咗五成，雖然天氣忽然轉凍，但帶住個暖杯keep住咳時有熱水飲，都叫做頂得住，只係個人仲有D攰同周身骨痛（特別條腰，可能前一晚瞓覺壓親）。

燒腩仔學校嘅觀課日分咗兩日，各有半班同學同家長參加，咁啱燒腩仔同妹豬被分開咗，所以艾菲無緣見妹豬媽一面，但妹豬媽早一日都有大約講過，睇完佢哋上堂會覺得好感動，所以艾菲一早同自己做定心理準備。

呢日無校車接送，所以艾菲要同燒腩仔一齊返學校，燒腩仔先入課室準備，艾菲就去禮堂聽校長介紹，聽返有咩要注意，最重要當然係叫我哋要投入，同埋唔好影相騷擾到學生，簡單講完就可以各自入去小朋友班房啦﹗

入到班房，小朋友們已經企晒起身歡迎我哋，燒腩仔見到艾菲無話好興奮，只係望吓望吓八八卦卦咁嘅樣，之後老師就叫大家一齊做體操，大部分小朋友都有跟住音樂做動作，除咗燒腩仔企咗喺到繼續發呆，每當佢望過來艾菲呢邊時，艾菲就即時擰開唔望佢專心望返老師，等佢知道要專心。

做完體操老師就叫大家小組坐聽故事，大家真係即刻推凳圍圈坐靚靚，初時燒腩仔都仲係繼續發呆，但老師講到一半左右，佢已經投入返識得舉手出去答問題，老師後來話想叫D未答過問題嘅小朋友出來，佢仲勁多事咁猛叫隔離位個同學仔出去添:P。

講完故事，老師就開始教大家一陣自選活動要做D咩，而喺呢個時候燒腩仔就開始坐唔定啦，pat pat完全唔喺張凳到，老師叫咗佢幾聲佢先坐返好少少，但無耐又再次起身擰轉望住我哋班家長喺到搞搞震，艾菲都無佢咁好氣>.<。

終於捱到自選活動嘅環節，呢一part係家長同小朋友一齊做勞作，起初燒腩仔都唔多理艾菲㗎，但佢見前面同學仔走埋來拖實媽媽，佢先無執輸咁來拖埋一份，同佢做完勞作同工作紙，吸好名印再交去適當位置後，佢話咁快就標咗入閣玩火車，艾菲就同其他媽媽吹吓水交流吓，然後忽然一秒唔使，三個喺閣入面玩緊火車嘅小朋友，一齊彈起身收晒D玩具再著鞋排隊，原來老師播咗歌示意夠鐘，但重點係D歌聲係超細聲㗎喎，事後同妹豬媽傾開都覺得老師呢個訓練好神奇，個個都好似上身咁即時收拾超合作﹗

跟住老師再次要求佢哋小組坐，將啱啱完成嘅親子勞作逐一拎出來分享欣賞，燒腩仔再一次pat pat坐唔實張凳，直情成個人反轉對住我哋班家長，今次艾菲都忍唔住指返佢望向前面，再加埋老師叫咗佢幾聲，佢總算坐返好咗DD，之後輪到佢份勞作被分享，佢都好主動舉手出去講解，表現都叫做有紋有路，艾菲感受到佢係真心享受自己嘅校園生活嘅。

分享完老師帶咗佢哋去洗手間排洗，家長就留喺課室填問卷，等小朋友搞掂就拎書包返埋位準備放學，唱埋放學歌就bye bye，當然燒腩仔又係四圍望唔做動作，事後都有同學仔媽咪笑佢，今日因為媽媽喺到所以特別坐唔定，平日佢喺學校係出名乖同鐘意對住人笑（佢上堂搞事畀老師罰嗰D得老師同艾菲知>.<），所以有唔少同學仔媽咪fans，唔...的確佢喺學校同屋企真係兩個人來㗎﹗就例如之前有同學仔媽咪報料，讚佢會主動去扶跌親嘅同學仔，艾菲聽完即諗「乜呢個我個仔來㗎？乜佢都識做D咁嘅嘢㗎咩？」，kakaka...

因為呢日提早咗一個鐘放學，艾菲本身諗過帶燒腩仔過海接米高放工，但大病初瘉嘅艾菲體力實在未回復，所以最終都係打退堂鼓，直接帶燒腩仔返屋企，喺屋企附近買個下午茶外賣，返上樓同燒腩仔食完就齊齊爭取時間午睡叉吓電，順便畀艾菲條腰抖吓啦﹗