結婚周年遇著星期六，好處係米高唔使特登請假慶祝，唔好處係我哋變得更hea，竟然無安排任何慶祝活動﹗其實呢...艾菲之前都有諗過呢日帶燒腩仔去東華or AIA嘉年華玩㗎，但係呢日個天keep住落雨，艾菲又啱啱先病好，所以都唔敢搞咁多嘢，只係一早起身帶燒腩仔返學校上興趣班，再自己歎個早餐享受吓每個星期六先勞氣後自由嘅空氣，然後接完放學就返屋企等米高放工返來一家人齊齊午睡鬥頹廢。
雖然係頹到無任何慶祝活動，但大餐點都唔少得嘅，體諒到艾菲宜家食唔到刺生生蠔，米高都唔敢話食buffet來刺激艾菲，於是揀咗去食Outback，仲喺艾菲病到死吓死吓時不斷提住，鼓勵艾菲要快D好返一齊去食好嘢咁話，好彩艾菲都爭氣停藥後無再惡化返，而無咗兩星期嘅味覺都啱啱喺前一晚返返來﹗YEAH!
好耐無食過Outback，例牌唔係好食牛扒嘅燒腩仔，對我哋件牛無乜興趣，主打竟然係食個可以refill嘅餐飽，佢一個人應該都食咗兩個有多（我哋為咗佢竟然refill咗兩次﹗﹗），然後就只係肯食個芝士薯條同蛋糕，至於艾菲覺得最好味係個炸蘑菇同甜薯，前者夠juicy，後者夠甜夠滑，結果真係食到艾菲飽到上心口，飯後要由尖沙咀散步落佐敦先舒服D咋﹗
早幾日，米高都有問艾菲今次要唔要買蛋糕返來慶祝，但艾菲心諗買個蛋糕返來食幾日先食得完就拒絕咗，然後食飽米高呢個魔鬼又問燒腩仔食唔食蛋糕，咁甜品控嘅燒腩仔梗係話食啦，於是兩父子就揀咗呢個芝士蛋糕，艾菲只係食咗兩啖就全件畀晒燒腩仔食，睇見佢食到舐舐脷嘅開心樣，真係心都甜晒，不枉我哋喺呢D屬於自己嘅浪漫日子都仲帶咁大個電燈膽出來，希望佢喺來緊嘅日子同BB豆豬都可以繼續咁通氣，等我哋可以喺D大時大節，有得開開心心一家人出吓街食吓好嘢回吓氣啦﹗
沒有留言:
張貼留言