未九點已經到，登記完先驗小便量血壓同磅重，搞掂就搵個位坐低慢慢等，起初見無乜人等仲覺得奇怪，無耐後忽然有班大肚婆同老公一齊衝入來，而診所都開始叫咪叫佢哋入房，艾菲先知前面仲有一班人早過自己，只係畀姑娘捉咗去聽講座消磨吓時間。
等咗陣之後，終於都有姑娘叫名叫艾菲同其他媽媽一齊入健康教育室，先填問卷講返對餵人奶嘅認識，跟住姑娘就開始講解BB喺媽媽肚入面嘅學習進度，鼓勵我哋多D同BB傾偈之類，講完就逐個叫名出去，派定張直接入院卡畀我哋旁身，再講返之前喺醫院做嘅test嘅結果，血報告，Oscar，同糖水測試艾菲都全pass，Good!
聽完報告可以出返去大堂坐，米高不停candy crush，艾菲就狂睇《醫護人生》 ，睇咗差唔多五集，由十點幾坐到差唔多十二點，終於有人叫艾菲名入房見醫生，一入去兩個姑娘就幫艾菲瞓上檢查張床到，然後醫生就隔住簾問咗D基本問題，例如到目前為止有無咩特別嘢，決定咗去邊到生未同幾時決定到，上胎點解開刀同手術過程順唔順利咁，問咗大概五分鐘先見佢施施然咁拎住個胎心機行過來，用對凍凍地嘅手摸吓艾菲個肚同聽心跳，只係講咗句頭仔向咗下size都OK就完...
之前一直以為醫生會講解吓開刀生嘅嘢，原來係艾菲自己諗多咗，最後艾菲都有主動問返如果揀喺QE生會開刀定順產，得到回覆係「你好堅持嘅話我哋都可以同你開刀」，會約38W做手術但無得自己揀日子，手術過程會係點傷口會點開更加係隻字不提，只係一再提醒手術室好full唔好約咗期臨時甩底，言下之意應該係「你去私家生吧啦」，哈哈...
安全計怕艾菲忽然有事要入QE生，醫生都叫艾菲填咗張授權書，畀佢哋向仁安醫院拎返艾菲生燒腩仔時嘅手術情況，而仁安醫院都真係好有交帶咁，過幾日後主動打返畀艾菲問清楚有無件咁嘅事，先fax D資料畀佢哋。
之前聽講座時，姑娘仲話今次會做分流，將媽媽們分去跟助產士小組或健康院，不過唔知艾菲係唔係已經去到太後期呢，醫生就直接畀咗個期艾菲34W再返去覆診，到時應該要同佢哋confirm喺私家定QE生，咁艾菲事後都有再同米高傾多一次呢個問題，生完無得抖真係死症來，眼見表妹最近喺威爾斯順產24小時即被趕走，連餵人奶姿勢都未學好就要返屋企自己搞掂個初生B，阿B黃得滯所以顧住瞓唔食奶又唔識，身為過來人睇見都替佢辛苦，所以艾菲最終都係決定返仁安生，至少養足精神先返屋企打怪獸，作戰能力應該會好D掛...（我哋除咗朝早有陪月幫手，夜晚真係全部靠自己㗎﹗）
約埋期走得已經係十二點幾，米高話難得出咗來，順路落旺角八珍訂埋醋先走（但後來發現喺AEON訂包送貨應該會抵D），之後再去花園街買咗幾條浴巾畀BB豆豬，艾菲返到屋企見有氣有力又開始執BB豆豬D嘢出來洗，眼見佢D衫係多到嚇死人（米高幫手洗衫時成日話一個人得一個身邊著到三四十件底衫，kakaka...），再唔情願都係要買個膠櫃返來放佢D嘢，千挑萬選後我哋揀咗AEON自家品牌Topvalu嘅四層膠櫃，諗住平平地三百幾蚊用幾年就算，仲一直以為平嘢實係大陸貨，點知返來拆盒先知係日本製喎，真係抵抵抵呀﹗
P.S: Blogger個留言好似壞壞地，連續兩個msg都係收到通知睇唔到，咁艾菲唯有喺呢到覆返大家啦﹗
Lui Karen：係呀，個櫃係AEON買㗎﹗
檬媽：哈...我已經諗定今次入院有咩劇想煲埋佢啦﹗小朋友D衫真係多到太誇張，再咁搞法我要搵迷你倉先掂啦﹗
沒有留言:
張貼留言