Kill Time好物

唔知點解，燒腩仔讀親嘅學校都無咩假放，就好似今次嘅農曆新年假，亦只係由年廿七放到年初七（無錯，佢今個星期一已經開始返學啦），但艾菲知道有D學校係放到初十，甚至十五先返學，放咁多日假，就算學校有假期作業，總不能消磨晒全部時間，艾菲又未必日日行得開帶佢去街放電，所以留喺屋企嘅時候總要搵D嘢畀佢做來kill time。



前排執屋，艾菲就搵返D之前in幼稚園或者學校生日會時收到嘅小手工套裝，平日無咩機會拎來玩，呢D放假嘅日子正好係拎出來用嘅時候，每套入面有齊所需物料，又有圖樣畀你跟住做，就算係無咩美術天份嘅艾菲同燒腩仔都可以輕易完成，就好似呢隻紙袋雞仔，燒腩仔做完不知幾有滿足感。



不過艾菲最推介嘅，其實係呢個馬賽克貼畫，可以訓練小朋友嘅小手肌之餘，亦可以考小朋友嘅認數字能力，耐性同觀察力，重點係艾菲上淘寶望過，呢種貼畫只需幾蚊一份（淘寶search馬賽克貼畫就會搵到），抵到無朋友﹗



圖畫入面有一格格數字，你首先要跟數字認返相應嘅顏色，然後再撕個貼紙貼落去。



呢D要用到小手肌，又咁考耐性嘅嘢，艾菲原先估燒腩仔玩唔得耐...



點知佢係出奇地好心機同認真，仲貼得靚過平時做功課，歪咗會自己撕返落來再貼﹗



足足用咗一個下午嘅時間，先完成到呢幅馬賽克畫，燒腩仔完成之後，仲勁興奮咁要即時show畀米高睇添﹗



其實除咗呢D貼畫之外，艾菲仲推介呢款迪士尼嘅《動動小手》系列，係艾菲有次路過AEON無意中發現，$23一本有米奇，反斗車王同公主款，內容其實類近好耐之前淘嘅幼兒趣味小手工，完全唔需要用鉸剪，只係跟指示撕個圖出來用膠水貼好每個部分就OK，兩者最大分別當然係佢入面嘅小手工全部係迪士尼圖案，唔單止燒腩仔like，連媽媽艾菲都覺得好靚啦﹗