相愛十年

十年，唔係一個短時間，能夠同一個人一齊走過十年，艾菲覺得絕對唔係一件容易事，特別係對艾菲呢D咁任性嘅人來講，十年前決定同米高一齊時，真係邊諗到我哋可以一齊到咁耐，認真半年唔分手已覺偷笑。

回望返十年前嘅時光，好多嘅剛剛遇著啱啱，原來緣份嘅嘢就係咁巧妙，喺跌跌撞撞之後畀艾菲喺對嘅時間遇上對嘅人，早一分遲一秒大家可能就此擦身而過，然後發現甚麼對的時間錯的人，或是錯的時間對的人，通通都忘記佢吧啦﹗

細水長流嘅十年，講真唔係完全無考驗，但我哋都一一跨過咗，宜家雖然已經變得老夫老妻，但艾菲敢講關係肯定比十年前更好，彼此更了解對方嘅需要，一句說話一個眼神已知對方心意，既是情人亦是知己好友，咁嘅關係真係好難得。

自從結婚之後，好耐無慶祝過拍拖紀念日，雖則話今年係十周年紀念，艾菲都無諗過要慶祝，難得比艾菲更無心肝嘅米高，居然提出早一日買個蛋糕來食（因為正日遇著年初一），點都叫做有D表示咁話喎，一打開蛋糕盒見到蛋糕面有朵花，艾菲係完全無冧冧豬嘅感覺，只係心諗「乜你揀個咁老土嘅款嘅」（但個蛋糕其實係幾好味），仲專登唔食朵花留返畀佢自己慢慢歎，kakaka...

十周年紀念都咁hea，到一星期後嘅情人節，我哋就更加唔打算慶祝啦，大情人米高仲走咗去返足全日工，漏低艾菲一個同小情人燒腩仔單打獨鬥足一日，本來艾菲好想親自下廚整格仔牛扒等佢放工返來食㗎（純粹因為自己想食），但米高極力反對怕夜同怕艾菲辛苦喎，最終係一家三口去食艾菲已經食上癮幾年嘅吉野家火鍋，大家真係咪睇少呢個吉野家火鍋，情人節當日係多人到八點幾都仲要等位，兼夾九點已經售罄㗎啦﹗

以前入世未深，仲滿腦子少女情懷時，邊會相信自己會甘心情人節去打邊爐，不過原來遇上對的人真係會覺得無所謂，皆因兩口子係相知相愛時，「日日都係情人節」呢句話就會變成真，就算鬧交鬥氣無來情趣都係sweet﹗當然有禮物有花收的話都唔拘嘅﹗嘻...