燒腩仔揮春

一年一度燒腩仔揮春終於都出場啦﹗今年艾菲咁嘅身勢，的確係有諗過唔整㗎，但整開咗忽然停產，燒腩仔婆婆實會好失望，所以見仲頂得住就照整啦﹗



第三年整揮春，每年都同自己講早D開工，一月頭已經同燒腩仔剪定頭髮，一月中就同兩個小model影相，今次不得不讚燒腩仔大個仔咗好影咗，以前成日影影吓走咗去無來合作嘅佢，今年喺氹吓玩吓嘅情況下，艾菲一個單對單同佢影一個鐘就搞掂晒（不過影完腰骨痛咗成晚>.<），反而表妹仔啦...真係影到艾菲無晒心機，成村人勁落力氹佢都唔肯就範，全程扁晒咀好可憐好委屈嘅樣，要出動至愛姨丈米高先肯畀少少面笑吓（佢好奇怪由BB開始已經係要見到米高先肯笑）。



月中已經搞掂晒D相，但艾菲就一直懶懶閒諗住拖到一月尾先砌稿，心諗仲有兩星期實夠時間，點知...忽然一場大感冒，被逼休息咗足足四日，拖慢晒個進度，搞到今個星期先正式開工，仲要遇著燒腩仔停課兩日加忽然病假一日，艾菲單係招呼佢都忙到一頭煙，然後hea爆咁為慳時間，決定用返上年嘅template換相就算，下年再加埋BB豆豬，混亂情況更加不敢想像，但可以的話艾菲真係想認真D搵過D圖砌過D新稿出來囉﹗



由於有晒經驗，今年又只係換相唔換稿，所以砌稿方面係快咗好多，只用咗兩晚時間就順利砌晒全套14張揮春，偏偏就喺後期工序出現一波三折，一直都記得係send JPEG file畀米高返公司print，點知印完先發現效果其差（起晒格），研究一輪先發現原來係yahoo email好聰明咁幫艾菲壓細D相，搞到米高又要專登返公司再print一次，之後就係計錯數cut錯PVC膠，整到半夜先發現新買嘅唔夠用，要漏夜搵返櫃底D存貨出來，好彩嘅係最終都趕得切喺星期五返娘家食團年飯前畀到燒腩仔婆婆同姨媽。



今年除咗自製揮春之外，艾菲都另外幫襯快圖美$99福袋，整咗一對揮春同20個利是封（另外仲有$50現金券可以用來曬相），揮春嘅效果略嫌有D行貨同色水唔夠靚，不過利是封又確係幾靚幾特別喎（個設計係可以做埋賀卡），燒腩仔婆婆收到都好開心，但講真其實無咩人啱派（除咗燒腩仔婆婆嫲嫲同艾菲自己呢D有戀孫/仔情意結嘅人，仲有邊個會收到利是封好好珍藏吖），所以下年應該唔會再整㗎啦﹗