燒腩仔嘅病情keep住反反覆覆，由年廿七晚開始又燒過，一直暗暗燒食藥都唔多退，但見佢好精神咁樣，我哋唯有當佢無乜嘢，自我安慰佢可能係發骨折（又真係高咗1cm喎），不過就唔多敢帶佢四圍去，連洗邋遢都拖到年廿九先做，然後米高一拎個吸塵機出來，燒腩仔已經第一時間搶住話要幫手，哈...今年真係大個仔啦喎﹗
見佢咁積極想幫手，梗係又畀返入全盒呢個任務佢做啦，一邊黑瓜子一邊紅瓜子，話咁快就入滿。
入完瓜子就到佢最期待嘅入糖環節啦﹗單係聖誕同農曆新年，學校同學仔同老師派嘅糖，已經多到艾菲今年完全唔使買糖入全盒﹗入多D﹗入多D﹗入到爆晒都未捨得停手﹗kakaka...
話咁快就放滿成個全盒，今次仲唔係盆滿砵滿﹗YEAH！
入完全盒就叫佢幫爸爸手貼埋D揮春，貼到成屋都係燒腩仔，艾菲呢個戀仔成狂嘅媽媽就最開心啦﹗
襯埋早一日喺花墟買嘅插花，之前行年宵買嘅蘭花，同燒腩仔公公親手種嘅水仙，全屋都充滿住新年氣氛﹗
除咗佈置屋企，艾菲都不忘要顧住燒腩仔兩父子個胃，明明屋企乜糕都有，米高又再三叫艾菲唔好搞咁多嘢，怕艾菲粗勞得滯會辛苦，但艾菲始終忍唔到手，自己整咗笑口棗同黃金奶黃年糕，我們這一家今年又可以過個肥年啦﹗
沒有留言:
張貼留言