行年宵＠維園

一年一度行年宵嘅日子又來到，原先艾菲計劃星期六先去行去逼，點知星期一天雨關係，學校個親子陸運會取消咗，忽然停課兩日無咩好做，星期一落雨加艾菲成手嘢未做又唔去得邊，星期二點都要帶呢個小朋友出去放放電，同米高商量完之後就決定呢晚帶佢過海接爸爸放工，順便去行維園年宵，呢個燒腩仔一聽到有得接爸爸放工不知幾興奮，仲一早就嘈住要坐叮叮車，廿四孝慈父當然會滿足佢啦，喺灣仔食完飯我哋就坐叮叮去維園。



記得之前幾年都係熱到要除衫，今年難得可以喺11度低溫下行年宵，感覺係有氣氛好多，而且燒腩仔今年開始大個，知道行年宵係咩嘅一回事，未入場就已經識得同我哋講價，話自己要買個風車走（佢唔知點解係好鐘意風車㗎），艾菲反問佢波波同風車只可揀一樣，佢都誓神劈願咁答艾菲話買風車，真係咁堅定？姑且睇吓點...



入場唔夠五分鐘，見到D哥哥姐姐拎住一大紥波波賣，燒腩仔已經即時轉軚話要波波，呢個時候仲要有個哥哥拎住兩個至愛Cars嘅波波埋來，艾菲見一個太大價錢又唔啱，另一個又同之前淘返來嘅差不多款，所以無幫襯決定揀吓先再算，可能因為我哋無即刻買畀佢，燒腩仔反而變得更期待，邊行就邊伸長條頸望邊到仲有Cars嘅波波，最過癮係今年興Elsa同小白波，啱男仔款嘅波波相對難搵，所以佢都失望咗幾次，終於畀我哋行到一檔有Cars波波賣，仲要只賣$30一個，為免再唔買燒腩仔會發難，艾菲價都無講就買咗畀佢啦﹗

買完波波，燒腩仔係超開心，但心就原來未足，因為成功買到波之前，艾菲勸過佢無Cars波的話Thomas波都殺啦（當時係怕搵唔到Cars波所以咁講），到後來真係畀佢見到Thomas波，佢就同我哋講想買埋，我哋即解釋每個小朋友只可以買一個波，而且佢個Cars波有晒車型，靚過Thomas圓波咁普通，聽完燒腩仔知道我哋唔會再買波畀佢，最近變得超現實嘅佢下一句就叫我哋走人返屋企囉﹗>.<



我哋當然無理佢繼續行，唔知係唔係第一日開檔關係，感覺呢日無咩人行得超舒服，我哋好快就行晒成個花市，而艾菲都有D收穫，就係平日好少有得散買嘅蝦叔叔一包，同埋阿姐見燒腩仔咁似韓仔，自動波減價到$30一盆嘅蘭花（原價係$100/3盆，單盆買要收$40，艾菲都係多口講句平D啦就有得減啦，呵呵呵...），真係抵到無朋友呀，希望返來轉盤時無畀艾菲整爛佢D根啦，來緊星期六應該會再去花墟睇吓有無靚嘅插花，到時配合埋燒腩仔公公盆水仙就更有新年氣氛啦﹗



難得大人細路都買到心頭好，我哋就帶住好心情返屋企啦，沿路艾菲仲同燒腩仔好開心咁講返呢晚行年宵嘅所見所聞添，點知...明明都返到屋企樓下，只差十幾步就行到入樓下大堂都可以出事...

話說離開維園後，為方便坐車，我哋就將燒腩仔個波波放咗入環保袋，艾菲一直小心翼翼咁保護住佢同棵蘭花，但去到屋企附近忽然有人扭米高抱，米高唔想就喺個環保袋到拎個波出來畀佢拎住行，艾菲當然唔理得佢哋兩父子咁多，但行咗唔夠幾步燒腩仔就突然大叫咗聲話個波飛走咗，艾菲回頭一望個波已經飛咗上商場頂，再望多兩秒正當艾菲諗緊辦法救佢時，個波已經飛咗出馬路再上咗天，三個人六隻眼眼白白咁望實個波飛走，下一秒發生嘅事唔使艾菲講大家都應該估到，燒腩仔即時喊到豬頭炳咁，唉...

為咗唔好發生呢件事，買完波時咁啱見到有個維尼熊波飛咗上天，艾菲已經即時同燒腩仔講，佢唔好好拎實個波就會飛走以後都唔返來，燒腩仔仲因為咁而份外小心，我哋已經幫佢喺個繩尾到綁咗個公仔畀佢拎，但佢除咗捉實個公仔，寧願唔拖我哋都一定要用另外一隻手再捉實條繩先放心，講真，艾菲咁耐以來都未見過佢咁認真咁緊張一樣嘢，小心到咁嘅情況以為安全啦，又有邊個會估到綁住波嘅另一邊繩竟然會鬆咗呢？

由細到大無論係燒腩仔病還是跌親受傷，艾菲都無咁肉赤過，望住眼前呢個好小心保護個波，但點努力都失敗而回嘅仔，嗰種肉痛真係非筆墨所能形容，嗰一刻除咗攬到佢實一實，盡量安撫佢之外已經咩都唔識做（以艾菲嘅性格真係從來未試過咁），好彩米高都知自己今次嘅決定衰咗（艾菲成日叫佢氹仔還氹仔，唔好搞咁多嘢出來嘛），即時提出第二日放工去買過個一樣嘅畀佢，燒腩仔聽到後都好快肯收聲然後上床休息，只係艾菲陪瞓時不停話「我今晚行年宵好開心，但仲好嬲爸爸」囉（咁艾菲當然又要解釋一輪呢個係意外，同爸爸無關係啦）﹗

艾菲擔心咗成晚，慶幸燒腩仔第二朝起身已經無咩嘢（但同婆婆講電話時仲係用好慘嘅聲來講返呢件事），而米高都順利買到個一模一樣嘅波返來，但好好笑嘅係期待咗成日嘅燒腩仔，衝去開門畀爸爸時見到個波竟然係話「乜你又買返呢個呀」（明明係你自己話要返呢個㗎喎...），然後就拎咗個波入屋玩咗成晚，事情總算完滿解決啦﹗

題外話1：
有朋友知道呢件事後都有問我哋打算點處理，買過個畀佢定當畀燒腩仔買個教訓？講真如果係燒腩仔自己唔小心搞到個波飛走咗嘅話，艾菲就一定堅決唔會再買等佢受吓教訓，但今次情況係你眼見佢已經好努力保護個波，係因意外而令個波飛走，呢個絕對唔係燒腩仔錯，所以能力許可我哋都會買返個補償畀佢，始終想佢開開心心過新年嘛。

題外話2：
米高第二晚去返同一檔買返同一個波，但個波已經由之前一日嘅$30加價到$38，米高講返佢知早一日買完飛走咗先返來再買，所以可以用返$30買（艾菲就話應該再講平D啦，點計都係佢哋無綁好個波之過嘛）， 如果大家呢幾日會去行年宵的話，不妨講吓價慳返D呀﹗