不過最近收到Sand House邀請去試玩，睇網頁見佢哋有齊玩沙玩具，仲有提供locker，毛巾同沖身設施俾客人，我哋只需同燒腩仔帶多套後備衫褲就可以舒舒服服咁去玩沙，咁我哋當然再無say no嘅理由，一於gogogo同其他blog友仔一齊玩餐飽啦﹗
Sand House位於觀塘，我哋坐地鐵去到觀塘站，出站唔使行五分鐘已經到相當方便，一入門口已經見到locker同拖鞋，感覺好似返咗屋企咁。
平日去沙灘，簡中都會俾D不知名蟲蟲或者蝨咬，但呢到寫明每兩日會用紫外光同1:99無害雙氧水殺菌，感覺真係幾安心，至少本身敏感底嘅艾菲同燒腩仔，喺到玩咗幾個鐘之後都無任何不適嘅情況出現，真心讚﹗
燒腩仔一到場，就好乖咁除鞋除襪入去玩，D沙有微濕感覺，同平時喺沙灘曬到好乾好鞋嘅沙唔同，踩落去有沙嘅質感但唔會刮腳。
試騎完近門口嘅馬仔後，好快就入咗去玩同其他blog友仔一齊玩沙，雖則專注嘅男人確係好吸引，但...佢真係玩咗呢架剷泥車勁耐囉，我哋氹咗佢好耐都唔肯試玩其他嘢。
終於...俾Little K吸引咗去玩呢條滑梯，齊齊放D車上滑梯到sir落來，艾菲真係幾欣賞Little K嘅諗頭，佢係一個好有創意嘅女仔呀﹗
玩完滑梯，終於肯試玩其他嘢，包括呢個半月型攀爬架，呢排手腳好似忽然協調咗，所以爬上爬落無難度﹗
之後米高用執波做理由，叫佢爬入鱷魚彈床到幫手執返個波出來，鱷魚嘅另一邊係滑梯來，但燒腩仔就不停話驚唔肯入去，所以就只此一次啦﹗
一齊玩完滑梯之後，燒腩仔就同Little K friend咗，見Little K拎起D沙灑落地扮raining，燒腩仔即跟住玩，然後兩個就不停raining raining咁叫，將D沙灑落去唔同嘅玩具到，天真嘅小朋友真係特別可愛㗎，哈哈...
玩到接近尾聲先終於發現呢個射籃彈床，同一仔兩個爬咗上去不停射波，玩到超hyper呢﹗
場內其實仲有呢D波波足球玩（有大人版同小朋友版），不過燒腩仔驚爬入去嘅感覺無玩，反而肚B，Tarebaby同一仔都好勇敢，爬咗入去試呀﹗
射籃彈床隔離就有呢個射箭同估佢係拋波遊戲嘅game，呢到果然係個大人細路都啱玩嘅地方﹗
場內仲有兩間party房，感覺好舒服好warm，包場開party時，玩到攰可以入去休息一陣都唔錯﹗
臨走前點都同咁多位blog友仔影返張大合照先啦﹗Yeah!
燒腩仔呢日真係玩得好開心，仲叫極都唔肯放低玩具走，要艾菲出動糖做利誘先掂，可見呢到對小朋友來講係幾咁吸引呢，今次真係好多謝Sand House嘅邀請呀﹗
Sand House
地址：觀塘開源道77號業發工業大廈一期6樓D室（觀塘地鐵站B3出口步行1分鐘）
電話：5593 9711
Facebook：https://www.facebook.com/sandhousehk
網站：http://www.sandhousehk.com
沒有留言:
張貼留言