車迷朝聖＠奧海城Tomica車展

身為一個超級車迷，今個聖誕又點可以唔帶佢去奧海城朝聖呢，不過之前爸爸日忙夜忙，艾菲實在無信心自己一個帶佢來，終於拖到今個星期日，一覺瞓醒又天陰陰咁，到中午時份仲落出雨，反正去唔到公園不如就go go go啦﹗



一入商場就見到試玩區，其實唔算多人，但都要排兩round先到我哋（1節15分鐘），咁艾菲就同燒腩仔去睇外邊D珍藏Tomica車仔，呢個超級車迷睇到眼定定，呢架話好靚，嗰架又話好靚，仲不停話「我乖你下次買俾我好無？」



終於入到場玩，但佢好唔好彩地夾咗喺兩個瘋狂兄弟中間，燒腩仔手上嘅車成日玩玩吓會忽然畀佢兩兄弟隨手就搶走，而佢哋媽媽係全程一直只顧玩電話完全唔理，見燒腩仔後來都有推開個睇落似有十歲嘅哥哥以示不滿（十歲都仲係咁，艾菲真係唔太接受到囉），佢都仲係繼續撞埋來阻住燒腩仔玩，米高終於忍唔住出聲叫佢讓開，然後佢兩兄弟先叫做收斂一D。



玩完車仔我哋就去咗另一邊睇車仔，燒腩仔一見到呢個咁大嘅show case，係邊嘩嘩聲邊甩開我哋手衝埋去睇，前前後後企咗喺到睇咗唔知有無十五分鐘，瘋狂程度係達至頂級㗎﹗



I'm No.1﹗由於我哋無消費無換到遊戲卷，所以影吓相當玩咗㗎啦﹗嘻...



熊貓車，個個搶住同熊貓影，但呢個小朋友就堅持影車頭。



影得熊貓車當然要影埋薯條車啦﹗



影埋聖誕樹就走啦﹗



點知行返出去見到另一棵由Tomica車仔砌成嘅聖誕樹，又影吓先﹗



之後喺商場入面行吓行吓，竟然畀我哋撞到米高超鐘意嘅Haribo熊仔﹗like完FB再同熊仔影完相仲有兩包糖送返添，今次真係有得玩又有得食啦﹗哈哈...