呢朝又有個小朋友起身扭計唔肯換衫出門口，亦有個媽媽成晚失眠搞到朝早執嘢執得勁慢兼甩漏，於是比米高原先set定嘅時間遲咗半個鐘先出到門口，起初都以為會遲好多㗎啦，但我哋喺屋企附近極速食個超飽肚嘅早餐，就即出發上巴士去上水，再轉的士去假日農場，估唔到只係遲咗十分鐘咋喎﹗（不過都係遲到囉:P）
一入場好快就已經搵到晉媽啦，晉爸仲好好咁畀燒腩仔黐車坐添，呢個車迷開心到呢，把口係全程未合埋過㗎﹗
之後行咗出去睇吓有咩玩，咁啱就輪到大爺玩空中韆鞦，真係要畀個勁大爺，燒腩仔睇完係完全唔敢玩， 只肯玩呢D搖搖馬仔。
玩完馬仔，燒腩仔就話爬樹屋，宜家呢D粗重嘢當然係由米高負責陪玩啦，上到去叫佢自己sir即喊晒口咁， 坐米高大脾sir就笑到四萬咁口，仲encore咗唔知幾多次。
玩樹屋期間，其他blog友仔都陸續到齊，米高見艾菲同大家好高興咁傾緊偈，就話想行落去探路睇仲有咩玩，於是燒腩仔又走咗去黐檬爸車坐，之後仲呃咗小寶爸陪佢拉車（實情係幫佢拉啦>.<），真係辛苦晒咁多位爸爸啦﹗
玩完車就一齊玩氹氹轉，燒腩仔嘅投入度係一百分，不停轉不停同我哋say hi，超級hyper﹗
跟住大家坐低休息陣食咗少少嘢叉電，就準備出發去餵小動物啦，大家都一臉期待嘅樣呢﹗
返來load相時先見到呢一幕，艾菲實在忍唔住cap佢出來，原來燒腩仔影大合照時，除咗死命咁去拖妹妹豬隻手，仲有重施魔術手指呢個故技㗎，不過妹妹豬明顯無佢咁好氣，kakaka...
我哋準備好啦﹗買蘿蔔時米高建議艾菲買呢D釣住嘅蘿蔔，估唔到之後影相出來嘅效果真係幾唔錯，而大家都玩呢枝釣魚桿玩得好高興呢﹗
大家努力釣免仔ing，但燒腩仔好衰囉，兔仔一咬住佢舊蘿蔔即拎返出來唔畀兔仔食，結果佢舊蘿蔔係餵得最耐最抵玩...
釣完兔仔之後，我哋就轉買呢D用竹籤篤住嘅蘿蔔來餵第二批兔仔，不過由於燒腩仔舊蘿蔔比較大舊塞唔到入籠，佢都等咗OK耐D兔仔先肯埋來食。
艾菲勁like呢張檬媽影嘅相，專注嘅男人真係好吸引呢﹗睇到艾菲心心眼呀﹗
餵完小動物，經過小食部，米高又慈父上身，怕個仔辛苦，買咗枝雪條慰勞佢，不過$4一枝自製橙汁雪條，又確係幾抵買嘅。
餵完小動物，見D要職員睇嘅game開始有得玩（只開1:00pm-3:00pm)，我哋就即刻去排隊，第一個玩嘅係呢個水桶滑梯，認真艾菲喺下面睇D小朋友玩都覺得驚，起初以為燒腩仔會唔敢玩，點知佢又出奇地enjoy喎，全程笑晒口兼識同艾菲揮手，玩完仲嘈住要玩多轉添﹗
排第二輪時等咗OK耐，排排吓就走咗去瞓側邊D吊床，記得當日喺宜蘭第一次玩吊床時，艾菲氹咗佢好耐先肯畀艾菲抱住瞓落去，今次見到波哥同晉晉玩就無有死咁一齊玩，朋輩嘅影響力果然大呀﹗
玩完第二輪水桶滑梯，燒腩仔本身仲話想玩第三轉㗎，見條人龍實在太長，我哋就力勸佢玩隔離條唔使點排嘅布袋滑梯，捉住米高sir咗都唔知止唔止十次，次次落來都笑到咔咔聲﹗
不過就喺呢個位發生咗件不愉快事件，話說到尾聲米高都sir到攰同肚餓，想暫停一陣去小食部買嘢食，燒腩仔就唔肯仲發難乜都唔理衝咗入條滑梯到，當時咁啱有個爸爸抱住個細B sir緊落來，好彩嘅係個爸爸剎得切掣避得開燒腩仔兼抱得實個細B。
雖然成件事入面無人受傷，我哋都覺得超級唔好意思，同個爸爸鄭重道咗歉之後，米高塊面明顯係燶晒，艾菲都忍無可忍要即時拉開燒腩仔，好認真咁解釋個危險性畀佢知，唉...希望佢下次發難時唔好再咁蠻啦﹗
同燒腩仔訓話完之後，艾菲就放咗佢跟米高去小食部買嘢食，返來見米高塊面又燶燶地，艾菲都大概估到燒腩仔應該期間又有D失控，為免掃興都無再講D咩，同佢食咗D嘢之後我哋就決定閃啦（特別鳴謝波爸波媽請佢食嘅半隻蛋，同埋檬媽喺我哋畀佢玩到謝晒時同佢玩咗陣）﹗
我哋三點幾左右走，其實來嘅時候都問過的士司機，呢個位係call車都唔會上來接客嘅（因為散場時間塞得好勁），但米高堅持話試吓出去截，咁艾菲心諗最多行落山，就當幫燒腩仔放埋最後嘅電啦，而且沿途都有樹蔭唔太辛苦，點知行咗唔夠五分鐘就遇到小檬一家，跟住我哋就黐車坐去咗上水火車站，今次真係麻煩晒檬爸檬媽啦﹗
沒有留言:
張貼留言