原先我哋約好十一月底㗎，但當日天陰陰仲落出雨，結果被逼取消，當時燒腩仔同米高都好失望，係...連米高都好失望，keep住成日不停問艾菲做咩要取消（因為夜晚已經無雨），改期到上星期日，點知天文台又出咗個雨雲預告，早幾日米高已經密切留意住天氣，然後到星期六天氣超差落咗成日雨，大家都以為又要改期時，忽然佢喺下午好認真咁叫艾菲通知檬媽千祈唔好取消，話星期日一定會停雨，最多凍D咁話...
結果真係畀燒腩家嘅天文台台長講中，一覺瞓醒個天清到呢，咁我哋當然按原定計劃去BBQ啦﹗一早同燒腩仔講，叫佢食完lunch就上床瞓晏覺然後出發，不過佢唔知係唔係興奮得滯，結果搞咗成個鐘先瞓得著，到夠鐘起身時當然又扭扭擰擰啦，但我哋都總算順利出到門口，去到檬爸檬媽同大廚文文叔叔，保姆契媽媽，仲有康樂組組長NT哥哥已經set好晒嘢，大爺亦已經到咗，有個小朋友原先扮怕醜，但大爺媽請佢食咗塊朱古力餅之後即刻醒神返，哈...果然係為食仔呀﹗
warm up完梗係趁佢哋未玩到好癲時影返張合照先啦﹗
影完合照無耐，佢哋已經走唔停，好彩有檬媽，大爺媽同保姆契媽媽幫手睇實，以艾菲宜家嘅能力實在唔夠佢哋跑呢﹗
另一邊廂，檬爸，NT哥哥，文文叔叔同燒腩爸就密密燒，等我哋一眾靚媽追仔之餘都可以有啖好食。
出得來玩，艾菲都唔預燒腩仔食得多，佢求其食咗一round，有嘢到肚就放佢出去繼續玩，檬媽教佢哋玩有隻雀仔跌落水，個個都玩到咔咔聲咁笑﹗
然後就到大師NT哥哥出場啦，妹妹豬好醒目，影完相識得要睇playback，確保靚靚先收貨。
玩咗陣等埋妹豬一家來，我哋就請NT哥哥幫我哋影大合照，嘩﹗小檬個pose型到呢﹗得閒要叫燒腩仔偷吓師先得﹗
影完大合照，NT哥哥仲好好咁幫我哋影咗陣相，其實睇得出NT哥哥當日個樣好攰，但都唔會交行貨hea我哋。
足球小將﹗三個男仔，有得玩就一拍即合﹗
疑似兩小無猜﹗但實情妹妹豬成晚不停叫住大爺，所以燒腩仔只係拖...住...先...㗎咋﹗噢...
雖然同妹妹豬只係拖住先，燒腩仔都好積極咁去奪取芳心㗎，仔...如果你對媽媽都有咁積極就好啦...不過艾菲都知這些機會不屬於自己㗎啦...
NT哥哥除咗做大會攝影，影完相仲要化身康樂組組長招呼一班小朋友，佢哋流輪要NT哥哥抱起玩飛高，真係睇見都替NT哥哥辛苦，艾菲唯有叫燒腩仔埋去揼吓骨等佢鬆一鬆啦，哈哈...
之後佢哋唔知做咩拉晒D凳圍圈，仲話自己開會叫大人走，艾菲企隔離聽佢哋D扮大人嘅對話，真係聽到忍唔住笑呢﹗
後來我哋仲拎咗NT哥哥部機來自己影添，大師用嘅機當然係勁嘢來啦，可惜以艾菲有限公司嘅技術，應該影咗唔少鬆郁蒙出來（好彩無激到大師嘔血），無記錯呢兩張好似係艾菲影嘅，對到焦都算係咁啦﹗嘻...
唔覺唔覺，我哋就玩咗成晚，大人細路都好開心好滿足呀，燒腩仔仲玩到唔願走話要留低繼續玩添（真係醜死鬼啦）﹗真係好多謝檬爸檬媽嘅熱情招待，由約期book爐到準備食物同物資，所有嘢都係心機來，下次再約嘅話艾菲都要早D入來幫手先得﹗
沒有留言:
張貼留言