QE見姑娘（11W）

過咗15W之後，艾菲早期嘅不適症狀係突然消退，無再日日作嘔作悶，又無再食飽頂住好辛苦，只係間中會失眠同繼續尿頻，然後有個坐唔定嘅媽媽，一好返D就每個weekend都爭取機會出去玩（趁行得走得仲未係好見肚，真係要帶燒腩仔出去玩多D嘛），結果day back BB豆豬嘅嘢又停頓咗咁，宜家都已經18W先仲寫緊11W嘅嘢，果然第二胎係無咁好心機㗎:P。

26/10/2015

呢日約咗8:30去QE見姑娘，平日無九點半都唔起身嘅艾菲（唔...咁遲起身主要因為艾菲本身係夜鬼，同埋燒腩仔係返下午班啦），為咗唔好遲到係好乖咁準時七點半就出門口，結果8:20已經企咗喺門口同成班公公婆婆一齊等開門，等到8:35先有個保安施施然咁走出來開閘，好彩上到去登記獲派籌號係2號。

今次講明只見姑娘唔見醫生，連小便都唔使驗，亦無得聽心跳（呢吓有少少失望），度高磅重之後姑娘就安排我哋成班新登記媽媽坐埋一邊睇電視，無耐就有姑娘出來講解QE嘅接見程序，Oscar檢查係咩，同其他喺QE生BB要注意事項，另外仲派咗本小冊子同新生兒新陳代謝篩查嘅傳單。

由於艾菲拎咗個二號籌，所以聽完介紹之後，好快已經有姑娘叫艾菲入房，姑娘態度超級nice（係之前喺威爾斯或健康院前所未見咁nice﹗），先問艾菲病歷，再問家族病歷，然後簡單了解家庭背景，跟住姑娘就安排咗個Oscar期畀艾菲，但結構檢查就話full咗無期，噢...

另外仲有飲糖水期同第一次見醫生期，由於第一次見醫生已經係31W嘅事，期間又唔會有健康院跟進，姑娘就話照完結構有需要可以拎醫生信返來改期，至於開刀還是順產嘅問題，姑娘當然好小心唔會亂答，但佢都透露第一次見醫生時，醫生多數會同艾菲傾開刀生嘅問題，連份順產意願表格都叫艾菲望吓就得唔使填住。

臨走前姑娘都有問艾菲對餵母乳嘅意向，艾菲當然係支持㗎啦，亦好開心佢解答咗艾菲嘅憂慮，因為艾菲成日驚第二胎會忽然無奶，但姑娘就話第一胎已經奶源充足的話，第二胎只會更順更多，咁即係艾菲只需要小心避免再出現塞奶發炎嘅問題就OK（但呢個先係對艾菲來講最難做到嘅事喎>.<），即時放下心頭大石﹗

見完姑娘就去樓下抽血，以為會好似威爾斯或者聯合咁同所有病人一齊拎籌慢慢等（想當年試過喺威爾斯等成個幾鐘先抽到血﹗），但原來我哋係有特快隊派，等咗唔使十五分鐘就搞掂出返來啦﹗而且抽血員手勢好到不得了，抽完四筒血後係一D痛嘅感覺都無﹗

總括第一次來QE嘅感覺，呢到嘅服務真係好到你唔信，走嘅時候艾菲都忍唔住Whatsapp米高大讚，甚至令艾菲有留喺到生嘅念頭，但...諗深一層當然係揀返私家啦﹗



由於成個過程唔使點等，所以抽埋血十點左右就走得，行斜路出返佐敦時，遇見個媽媽會姨姨叫艾菲填form，其實艾菲陀燒腩仔時已經入晒各大媽媽會，今次都無咩意欲再入會，但見姨姨咁熱情艾菲又得閒即管幫佢填張form，點知填完一張form後，姨姨叫埋其他媽媽會嘅姨姨埋來，艾菲只需喺其他form到簽個名（姨姨幫手填返資料），就拎到以上咁多贈品啦﹗但更估唔到係一星期後真係有個別媽媽會打來update，仲送媽媽奶粉，藻油丸，湯包，衫仔同包被上門呢﹗