艾菲也瘋狂＠迪士尼

上星期五係燒腩仔難得一日嘅學校假期，艾菲一早就諗住同佢拍拖入迪士尼，一心去影吓聖誕樹同聖誕米奇米妮，點知呢個仔由星期二開始一連三日瘋狂跳掣，幾乎由朝早起身打開眼開始，就一直搵嘢來嘈到夜晚合埋眼為止，亦好可能係陀住BB豆豬嘅荷爾蒙影響，艾菲呢排係特別燥同易喊，好記得星期四送完佢上校車，艾菲一入屋企門口即忍唔住爆喊，嚇到咁啱趁lunch time打來慰問嘅米高死。

艾菲知呢D位除咗接受同等燒腩仔自己開竅真係無嘢做到，不過日日對住個隨時病發嘅小豆丁，無壓力無感覺唔氣餒真係無可能囉，但出奇地燒腩仔喺星期五朝忽然回覆正常，仲主動同艾菲道歉認錯（艾菲星期四成晚無理佢），見佢真係成朝都無搞事好合作，天氣又比預期中好，艾菲就決定按原定計劃出發去迪士尼。

基於燒腩仔上次講過想睇煙花，艾菲又陀住BB豆豬咩機動遊戲都唔玩得，入去純影相的話唔需要太早入場，就同燒腩仔講好瞓醒晏覺三點準時出門口，點知呢個小朋友先係唔肯瞓，然後到夠鐘又唔肯起身換衫，扭擰一輪出到門口已經三點半，再等吓巴士去吓洗手間咁，入到迪士尼已經五點幾，天都就快黑咁滯。



雖然比預期中遲咗好多先到，但都無損艾菲同燒腩仔嘅心情，我哋兩母子全程有傾有講，仲好開心咁plan定點玩，先同著咗聖誕衫嘅米奇米妮影相，再去側邊畫畫，之後坐火車去幻想世界搵埋Pluto影相，再等睇parade同煙花...影呢張到此一遊相時心情仲好好㗎，艾菲又點會估到影完呢張相佢就隨即病發呢...

轉個彎入場之後，果然畀我哋見到著咗聖誕衫嘅米奇米妮，但一睇條人龍艾菲已經估到已經截咗，然後有人就開始病發超扭擰，咩都話唔好都算，仲忽然唔講道理地爆喊起來，結果係嬲到艾菲勁想即時返屋企，奈何單憑艾菲一人之力實在無辦法同佢惡鬥，結果艾菲係忍唔住打咗畀米高呻，再講吓講吓自己都喊埋一份...



經米高呢個中間人疏導後，艾菲總算冷靜落來，亦終於同燒腩仔講和，既然無能力帶佢走，唯有留低等救星來，為咗唔好再浪費呢一日，艾菲盡量放低唔開心嘅情緒，爭取時間同佢去咗玩小小世界，由於有人一上船就話驚（明明之前玩過咁多次都無話驚﹗），艾菲就一手將佢攬咗埋身，然後剩機講佢知，佢成日扭計令艾菲呢排好唔開心（艾菲一直主張大人都要將自己感受話畀小朋友知，佢哋其實係明同有知情權㗎），重申艾菲係好愛佢，之後兩母子又講到眼濕濕咁出返來（艾菲呢期實在超眼淺）。



坐完船仔本來想陪佢玩旋轉木馬，但條人龍唔知點解超長，所以就帶咗佢去城堡出面坐低食D嘢等睇night parade，坐到腳痺先終於開場（完show時艾菲真係痺到對腳郁唔到呀﹗），好彩有燒腩仔至愛McQueen，有人即刻笑返晒，之前發生過咩事都唔記得啦﹗



睇完parade，救星米高亦順利趕到入來啦﹗艾菲見到佢即刻安樂晒，燒腩仔亦都變得好合作，我哋仲好開心咁喺迪士尼聖誕樹前影到張靚靚全家福呢﹗



之後行吓shop等夠鐘出去睇煙花，基於之前等睇parade坐到腳痺，上次又無霸頭位都影到靚相，所以今次等到最後五分鐘先行去城堡附近。



可惜今次遇著大班騎膊馬黨（六七歲都仲玩騎膊馬﹗），艾菲係乜都影唔到㗎，但不得不讚新煙花確係幾靚幾好睇，唯有下次搵個好位再睇過啦﹗



睇完煙花我哋就急急腳徹退，而燒腩仔經過之前扭計嘅位，都有主動話自己下次會開心玩，見佢真係記得自己做過嘅衰嘢知錯咁樣，米高又慈父上身話要請佢食芒果芭菲（明明前一晚先講好，再扭計蝦媽媽就無啫喱食>.<），呢個為食仔有得食梗開心啦，咁艾菲都好簡單要求好低，只要佢開心艾菲自然開心。