每年一到十一月，D鋪頭就開始放D聖誕布置嘅嘢出來賣，當中最吸引艾菲視線嘅一定係snowball，硬係覺得好warm好靚好有聖誕氣氛，但一諗到價錢唔係特別平，又只放到一個聖誕節，仲要怕畀粗心大意嘅燒腩仔整爛，艾菲每次都係睇完就放低唔捨得買，終於前排睇到個website教整snowball，原來製作過程係好簡單，成本亦唔係好高，艾菲即刻決定自己DIY返個來應節。
首先介紹吓材料：
1. 玻璃樽，$0，無記錯係燒腩仔當年嘅baby food jar來，艾菲想當日成日諗住整jam，見佢細細個size good fit就留咗喺到，結果jam只係整咗一次咁大把，宜家個樽終於再有用武之地啦﹗
2. 膠水，$0，屋企存貨
3. 閃粉，$3，呢個係最重要又最難買，艾菲搵咗好多間連鎖書局，唔係話無賣就話無貨，終於某日路過新蒲崗一間小型玩具鋪畀艾菲搵到，老板話宜家無人肯賣呢D幾蚊貨仔，有都係賣一大樽收十幾廿蚊咁話
4. 裝飾公仔，$12，係樂富UNY $12店賣嘅聖誕吊飾來，一pack有兩個，另一個聖誕老人已經畀艾菲掛咗上聖誕樹
5. 汽水蓋，$0，視乎情況而用，無需要可省略
成本＝$15﹗﹗﹗大家無眼花睇錯，呢到只係用咗$15咁大把（如果個裝飾公仔除返一半，實情係$9添）﹗
Step 1：
首先用熱溶膠將裝飾公仔固定喺玻璃樽蓋到，由於艾菲個雪人比較細粒，所以先要用個汽水蓋墊高佢，等佢出來效果突出D，如果個公仔夠高夠大隻，就唔使加汽水蓋。
Step 2：
搞掂裝飾公仔，就可以倒水同膠水落玻璃樽到然後攪勻佢，艾菲第一次睇個website教水同膠水比例係7:3，不過後來又睇過有D website話隨意落就得，亦有website教唔用膠水都得，所以艾菲都係大約做到7:3就算無認真量。
Step 3：
D水OK就可以落閃粉，逐少逐少咁落再攪吓佢睇效果，艾菲起初以為自己落多咗，不過後尾又發現D閃粉會沉底，所以出來效果都無話太over。
大家睇完係唔係覺得好簡單呢﹗艾菲原先都有諗過同燒腩仔一齊做親子吓㗎，但一諗到又玻璃樽又熱溶膠咁，艾菲都係怕佢有破壞無建設，最終等佢返咗學先慢慢搞，然後佢放學返來見到嘅comment係「哈...呢個好得意呀﹗」，好彩喺艾菲再三警告眼看手勿動後，佢暫時都唔敢太多手。
雖然無份整snowball，艾菲都有畀佢幫手布置聖誕樹，負責掛聖誕波呢個重任，等佢感受吓聖誕節氣氛㗎﹗
棵聖誕樹由佢一歲買到宜家三歲，竟然...今年都仲未高得過棵樹，仔...唔該你食多D嘢跳多D，唔好只係顧住橫向發展好嗎？
有相為證，分別係一歲同兩歲時影，頭兩年都有一直向上標高，一過兩歲個高度增長嘅速度就慢咗落來，所以有媽媽話兩歲前要谷肥谷大阿B係有道理㗎﹗
沒有留言:
張貼留言