4/11/2015
由於陀燒腩仔時，威爾斯只畀到中孕期嘅Oscar檢查艾菲，所以當年嘅Oscar檢查係自己出去私家做，今次QE竟然畀到期艾菲，可以慳返幾千蚊，艾菲已經好感恩，亦因為有過燒腩仔嘅經驗，艾菲又未去到高齡，都無話擔心到要做T21或者Nifty，Dr Wong同我哋兩公婆都覺得Oscar已經好夠。
由於聽聞QE照Oscar可以畀老公一齊入，所以一有期就叫米高請定假，呢朝我哋將燒腩仔交畀嫲嫲照顧，陪過艾菲去Dr Wong到覆診之後，燒腩仔每次聽到艾菲去覆診都嘈住話要一齊去，艾菲唯有解釋小朋友唔可以去醫院，去診所都要乖先可以去，好彩佢聽完都表示理解放我哋出門口。
準時去到QE，先去會計部拎飛仔再去登記，簡單填咗份問卷後就可以入房坐，我哋約咗十一點，都預要等一陣，最壞打算係米高食唔切lunch就要趕返工，好彩45分鐘後就到我哋啦，同我哋檢查嘅係一個姑娘，無上次見到個咁nice，只可以話態度唔係差正正常常咁囉。
一入房姑娘就叫艾菲瞓上床，好快佢就埋位照超聲波，BB豆豬算好乖豬，姑娘一照已經搵到佢，亦無反轉面郁來郁去唔合作（只係向後彈咗一兩吓，哈...），姑娘先睇鼻骨，再好認真咁度咗幾次頸皮，艾菲已經唔太記得個數係幾多，只係記得係合格好靚仔嘅數來，循例艾菲都試吓問睇到性別未，姑娘當然話太早未睇到。
記得想當年喺私家到做Oscar，醫生睇完鼻骨度完頸皮同身長就收工，但姑娘今次除咗度埋身長，仲同我哋做埋初步嘅結構評估喎，好認真咁睇BB豆豬嘅腦係唔係蝴蝶型，又同我哋睇晒左右手同數手指，感覺超Good呢﹗
雖然自己唔係高齡，但由於陀BB豆豬初期，艾菲嘅心理壓力真係幾大，一直都好怕佢會出事唔pass Oscar，結果Oscar個數好靚仔，又同米高一齊見證佢由一粒豆慢慢變成一個人型嘅BB，姑娘再同我哋confirm佢有手有腳有腦，艾菲係即時安心咗好多。
照完超聲波出來，等咗陣之後就有另一個姑娘叫艾菲去抽血，今次只需抽一筒血就夠，但相對上次個抽血員，今次堅係覺得痛囉，好彩止血後無瘀咗一大撻，亦無收到醫院電話通知BB豆豬有事，呼...
搞掂已經十二點幾，米高知艾菲唔會就咁放佢返工，所以陪咗艾菲去仙跡岩撐枱腳食埋lunch先走，仲叫咗杯乳酸做奬勵呢﹗well...由於陀BB豆豬初期只愛食垃圾食物，艾菲今次係比上次更加放肆㗎，頭三個月唯一有戒嘅係魚生刺身同茶，來緊日子入面魚生刺身應該會乖乖全戒（皆因呢期D李斯特菌好似好勁，但想當年陀燒腩仔時艾菲係照食只係食少D咋﹗），但茶已經好快破咗戒（但都限定一日最多一杯），凍飲呢...天氣咁熱你叫艾菲唔飲真係忍唔到囉...
沒有留言:
張貼留言