Half way to go（20W）

過咗個開開心心嘅聖誕節，終於來到BB豆豬其中一個重要里程碑，就係20周大啦，再過多20個星期之後，艾菲同米高就會再做爸爸媽媽，燒腩仔亦即將升級做哥哥，我哋嘅三人世界好快會變成一家四口﹗

宜家艾菲嘅身體狀況比早孕期時算係好咗，少咗失眠同忽然無電嘅情況，亦無再keep住爆暗瘡，咩都食得落兼胃口唔差，之前最辛苦嘅腸胃問題幾乎無晒，而最慶幸係喺超放肆嘅情況下，肚圍暫時都只係得32.5寸，至於重量呢...係無磅到嘅...嘻...面形同手腳無咩大改變，唯一係對「鬆」真係大咗好多，明顯比第一胎谷奶時仲勁，雖然係件值得高興嘅事，不過...以艾菲小矮人嘅身型配咁大對「鬆」，著衫真係無咁好睇囉...有日燒腩仔仲同艾菲講咗以下一番說話...事後講返畀米高聽佢係笑爆咀，艾菲就自覺超尷尬...

某日燒腩仔難得肯嗲吓艾菲，睇睇吓卡通片將個頭挨咗喺艾菲個手臂到，然後...
燒腩仔：（忽然指住艾菲個「鬆」）媽媽，BB豆豬係唔係喺呢到呀？嘩﹗佢真係大咗好多呀﹗點解佢會大咗咁多嘅？
艾菲：.......（滴汗mode）BB豆豬係喺呢到（指住個肚），呢個係媽媽嘅私人部位，你唔可以隨便掂㗎﹗

雖然個肚到宜家都唔係好大，不過已經開始感受到佢嘅重量，特別係食飽時會覺得好墜好重，暫時未有腰骨痛嘅問題，但行/企得耐真係會覺得條腰好攰要坐低休息陣，有兩晚仲離奇地出現左邊膝頭痛嘅情況（唔知係水腫還是著錯鞋），好彩long高腳瞓同轉著波鞋之後無再痛，至於艾菲超勁緊張嘅肚紋，touch wood都無出現（上次無今次都千祈唔好有﹗），連肚中間條黑線都未見，只係前排有幾日天氣乾燥時超級痕，忍唔住R損咗少少，但密密搽肚紋膏加天氣無咁乾燥後已經無咁辛苦，呼...

隨住BB豆豬嘅胎動越來越實在，艾菲個心亦變得踏實咗（其實無認真數，亦真係唔得閒數，只係間唔中feel到就當佢安全），但面對下星期嘅結構檢查，點都係有少少擔心（做媽媽嘅總係咩都擔心一餐），希望順利pass啦﹗心態上開始ready做第二任媽媽，越來越期待BB豆豬嘅來臨，得閒嘅時候會開始同佢傾偈，不過現實係諗到唔知間屋仲可以喺邊到變D位出來放BB豆豬嘅嘢，同埋一湊二嘅非人生活，真心覺得有D頭痛同唔知點算...

至於米高，都應該開始ready做第二任爸爸，艾菲煮唔到飯時唔會再有微言，甚至艾菲挑起條神經話想食咩都會盡量滿足，就算艾菲有時無理取鬧亦會忍住脾氣安撫咗艾菲先，放工返屋企會主動做晒D家務，放假或半夜會自動波去照顧燒腩仔，等艾菲可以抖吓輕鬆吓，唯一唔好係成日都唔願同BB豆豬講嘢（上胎都係逼先講），艾菲每次叫佢同BB豆豬講嘢，佢都只係摸住個肚講「BB豆豬，你快D瞓啦，早抖」﹗>.<

而燒腩仔都似係接受咗做哥哥嘅事實，仲好期待BB豆豬嘅來臨，成日話佢會好錫BB豆豬（但下一句係話「我唔會錫你（即艾菲）」，嗚...），艾菲已經開始改口叫佢做哥哥，亦洗腦咁同佢講定做哥哥之後可能會出現嘅狀況，佢宜家有時會話「我第時幫你推BB車好無」，又會話「我幫你餵奶同拎片」，就連幻想他日大個揸車去玩都有BB豆豬份，「我第時揸車帶你哋去迪士尼玩，爸爸坐我隔離，媽媽同BB豆豬就一齊坐後面」，艾菲估佢過咗早期呷醋鬧事階段之後，應該會係個好哥哥來嘅...

雖然一過聖誕間間百貨公司都減會，但暫時未照結構始終唔敢買嘢畀BB豆豬住，其實今次除咗奶樽奶咀，尿片同紗巾之外，真係無咩嘢要特別買，衫已經有一大堆舊衫可以執，奶泵亦可以用返燒腩仔姨媽個medela swing，好多日用品都可以用返燒腩仔嘅，至於自己置裝嘅問題就竟然拖到宜家仲未落order，影唔影大肚相仲係十五十六未有決定，入院同坐月用品就更加係懶得買住啦﹗

喺又驚又喜嘅情況下走過咗一半嘅孕期，期望餘下嘅日子能夠過得舒舒服服同無咁多煩憂，BB豆豬繼續健健康康咁長大，艾菲嘅體重血糖血壓keep住正常就OK，尤其係BB豆豬出世嘅過程，一定要順順利利千祈唔好學哥哥當年咁驚險（不過今次直接開刀應該出意外嘅機會低好多啦掛...）﹗