30/11/2015
因為Dr Wong話可以照完Oscar後一個月先搵佢，我哋就揀咗呢日接埋燒腩仔放學先來，未出發前艾菲已經同燒腩仔講今次應該會知BB豆豬係弟弟定妹妹，仲教佢叫BB豆豬要合作，最重要係腿張開唔好等我哋失望，哈哈...
呢日好順利準時到達診所，不過艾菲呢排飲食實在有D放肆，出發前又keep住有D頭痛，所以都擔心血糖或者血壓是但一樣唔合格，好彩最終兩樣都pass，而重量都乎合標準，無記錯咁多個星期以來只係重咗7磅左右，肚圍亦只係得31寸半，就算著緊身衫大家都只會以為係肚腩，面同手腳睇落都無咩點肥，不過都開始要著返之前陀燒腩仔時買落嘅大肚褲啦，最驚訝係乜當年自己有咁肥咩（當年一直覺得自己唔係好肥㗎喎），著住條大肚牛仔褲出街，除咗keep住甩褲之外，仲闊到畀米高笑艾菲好似偷人條褲來著咁囉﹗>.<
呢日診所都多人，但燒腩仔為咗見BB豆豬都好合作（只限入去前），等咗半個鐘左右先到我哋，一入房Dr Wong就問返做咗Oscar未有無咩消息，咁政府嘅檢查無消息即好消息，呢個佢應該比艾菲更清楚，之後再問吓艾菲身體狀況就埋位照超聲波啦﹗
Dr Wong照之前都話今次可以開估啦，仲問定艾菲到底想要仔定女，然後一照Dr Wong就即刻定格，畀個V shape艾菲自己睇，哈哈哈...BB豆豬果然好乖豬，每次都咁合作，唔使我哋心思思再等下轉先開估。
然後Dr Wong幫BB豆豬度埋身長，睇胎水，頭仔，肚仔同腳骨，再一齊聽吓心跳，樣樣都好標準，同周數完全吻合﹗ 另外都睇埋胎盤位置，Dr Wong話喺較高嘅位，所以一定唔會有胎盤前置嘅問題，Good﹗在艾菲來講，最緊要係BB豆豬有乖乖，一日一日咁慢慢喺艾菲肚入面長大，只要健健康康足月出世就夠㗎啦﹗
唔知係唔係Dr Wong今次唔趕時間呢，所以今次都有心情招呼埋燒腩仔，見佢入房有叫醫生叔叔，又乖乖坐定無搞搞震，Dr Wong仲專登照BB豆豬舉起手嘅動作畀燒腩仔睇，話佢知BB豆豬同緊佢say hi，但就輪到燒腩仔好似唔係好接到囉，kakaka...
臨走前艾菲都有問Dr Wong關於胎動嘅嘢，佢話艾菲陀第二胎，應該會早D feel到胎動，的確艾菲由15W尾，間中就feel到個肚有一吓郁，但一吓之後又好似feel唔到再有嘢郁咁，所以到目前為止都係唔太確定，希望BB豆豬大D又會叻D，多D郁手郁腳來等艾菲知道你喺肚入面一切平安啦﹗
同Dr Wong傾完我哋就出去等約期啦，而同樣有咗BB兼同樣係睇Dr Wong嘅艾菲表妹就入房睇（佢係專登約艾菲之後個期㗎，kakaka），我哋等埋表妹出來就一齊去咗婚紗街間明洞Express食飯，嘩﹗久違了嘅韓國菜﹗久違了嘅韓式牛肋骨﹗久違了嘅泡菜呀﹗艾菲好似餓咗好耐咁，竟然可以一個人將成碟飯連配菜同湯全部掃晒﹗至於燒腩仔都好強勁呀，我哋叫咗個紫菜飯卷俾佢（即韓式壽司），佢一個人KO咗六件﹗平日喺屋企都唔知幾耐無食咁多飯啦﹗
沒有留言:
張貼留言