艾菲雖然唔係教徒，但小學到大學都係讀基督教學校，對於聖誕崇拜大概都有個概念，之前都擔心聖誕崇拜唔知會唔會悶親燒腩仔，好彩學校都安排得好好，一個鐘嘅崇拜入面有老師帶領唱聖誕歌，又有K3學生表演，燒腩仔失控極都有個譜。
完咗崇拜就返學校進行慶祝會環節，前一日已經預告會有雪糕食，仲一人派咗張雪糕卷，搞到燒腩仔勁期待，點知一入學校就見到操場條人龍打晒蛇餅，正常媽媽都會選擇遲D先食啦，但點說服為食燒腩仔呢？終於揀咗條無咁長嘅爆谷隊來排，點都搵D嘢封住佢個口先﹗
因為食住爆谷同有佢好like嘅副校長喺到維持秩序嘅關係，我哋好順利咁排到呢架鹿車來影相，之後仲有阿sir扮聖誕老人出來同小朋友影相，不過就排到時燒腩仔突然發難話要走，仲喊晒咁要艾菲拉佢埋一邊「傾偈」，呢個仔從來都唔係有得玩就乜都得嘅人來，唉...
平伏情緒之後，我哋就入咗燒腩仔課室玩，老師好有心思咁整咗幾款靚靚相框畀我哋拎住影相，燒腩仔明顯唔多有興趣，都肯畀艾菲影咗幾個相框，算係咁㗎啦﹗
逛吓逛吓，仲畀艾菲發現咗呢個燒腩仔做嘅聖誕吊飾，又整得幾靚喎衰鬼...之後同佢班主任影相，再係咁易傾咗幾句，好開心老師同艾菲講燒腩仔喺學校有進步，仲讚佢願意同同學分享玩具，亦鼓勵艾菲要加油（其實我哋keep住有溝通，老師都知燒腩仔喺屋企D惡搞嘢），老師連媽媽嘅感受都關顧埋，真係好到加零一﹗
離開課室之後，其實都唔可以再呃到燒腩仔幾耐，為食仔堅持長一長人龍都要排隊食咗雪糕先，好彩嘅係學校喺呢個時候已經安排咗第二架雪糕車入來疏導人流，但我哋都要排到出學校門口...>.<大家無睇錯，學校真係安排咗兩架富豪雪糕車來派雪糕，一人一杯仲要不收分毫，呢個安排同艾菲之前預計嘅雀巢雪糕有好大落差，學校真係超有心囉﹗LIKE!
千辛萬苦終於換到杯雪糕返來畀佢食，不過呢個自私精一啖都唔肯請艾菲食，艾菲越話想食佢仲專登食得快D（呢期成日都係咁，逢親佢鐘意嘅嘢都要霸住，艾菲一話食就畀佢鬧，但米高又食得㗎喎），但其實艾菲本身都無諗住食，為咗BB豆豬艾菲都有乖乖戒雪糕嘅，所以今次由佢開心enjoy自私食算。
食雪糕期間，我哋搵咗校長同老師們集郵影相，再同同班同學仔一齊玩咗陣，然後有個為食仔見人哋有棉花糖，又話自己食完雪糕之後要食（其實食爆谷前已經話要食，不過條龍長到見唔到尾所以無拎），結果就畀佢拎到全校最後一枝棉花糖，之前見其他小朋友嘅棉花糖都係細細枝，點知佢呢枝清倉棉花糖係超大枝，嚇到艾菲要即刻四圍搵人幫手食，否則我哋兩母子實食到糖尿超標都似﹗
玩完咁開心嘅聖誕崇拜+慶祝會，燒腩仔返到屋企都不忙要同同學仔分享吓，好努力咁做工廠女工幫忙預備聖誕禮物，艾菲本身係無諗住整聖誕卡或預備小禮物㗎，但眼見大家都好有心咁準備晒聖誕卡同禮物包，臨急臨忙下去反斗城買咗D mini泥膠畀大家，希望大家喺呢個聖誕假期有得食之餘都有得玩。
而學校喺放聖誕假前一日放學，就每人送咗個雪人袋，入面有一個星星燈飾（嘈到爆咋），可以留返遲D睇燈飾時玩，另外仲有個薑餅人吊飾DIY套裝，艾菲見盒面寫住3+，以為燒腩仔應該handle到，點知拆開一睇發現都幾複雜，最終艾菲自己完成咗一個，就懶蟲上身唔願再整落去啦，嘻... :P
沒有留言:
張貼留言